અમદાવાદ: બરોડા ડેરીના ચૂંટણીમાં વિલંબ મામલે હાઈકોર્ટનું સરકાર સામે કડક વલણ, આગામી 18 માર્ચના રોજ ચૂંટણી યોજાશે

આજે સરકારી વકીલ દ્વારા બરોડા ડેરીની ચૂંટણીને લઈને મહત્વપૂર્ણ માહિતી કોર્ટમાં રજૂ કરવામાં આવી છે. ચૂંટણી કાર્યક્રમ મુજબ 21થી 26 ફેબ્રુઆરી સુધી ઉમેદવારી પત્રો મેળવી શકાશે અને 26 ફેબ્રુઆરી ઉમેદવારી પત્રો ભરવાની અંતિમ તારીખ રહેશે. 28 ફેબ્રુઆરીએ ઉમેદવારી પત્રોની ચકાસણી કરવામાં આવશે, જ્યારે 2 માર્ચે ઉમેદવારી પત્રોની યાદી પ્રસિદ્ધ થશે. 3થી 7 માર્ચ દરમિયાન ઉમેદવારી પત્રો પરત ખેંચી શકાશે અને 9 માર્ચે હરીફ ઉમેદવારોની આખરી યાદી જાહેર થશે. બરોડા ડેરી માટે 18 માર્ચના રોજ સવારે 9 વાગ્યાથી બપોરના 3 વાગ્યા સુધી મતદાન યોજાશે અને એ જ દિવસે સાંજે 4 વાગ્યાથી મતગણતરી શરૂ કરવામાં આવશે.

સુનાવણી દરમિયાન ખંડપીઠે અધિકારીઓને કડક શબ્દોમાં ટકોર કરતા કહ્યું હતું કે, “તમે બરોડા ડેરીની મતદાર યાદી પણ પ્રસિદ્ધ કરી નથી, તો પછી સુધારણાની વાતો કેવી રીતે કરી શકો?” કોર્ટે વધુમાં જણાવ્યું કે કાં તો તાત્કાલિક ચૂંટણી યોજવી જોઈએ અથવા વહીવટદારની નિમણૂક કરવી જોઈએ. સરકારી સ્ટાફ અન્ય કામગીરીમાં વ્યસ્ત હોવાના બહાનાને પણ અદાલતે ગ્રાહ્ય રાખ્યું નહોતું. હાઈકોર્ટે સ્પષ્ટ ચેતવણી આપી છે કે આવતીકાલે તમામ જવાબદાર અધિકારીઓ વિરુદ્ધ અદાલતી તિરસ્કાર હેઠળ ‘ચાર્જ ફ્રેમ’ કરવામાં આવશે. આ ટિપ્પણી બાદ વહીવટી તંત્રમાં ખળભળાટ મચી ગયો છે. બીજી તરફ હાઈકોર્ટની કડક કાર્યવાહી બાદ હવે બરોડા ડેરીની ચૂંટણી સમયસર યોજાશે કે નહીં, તેના પર સૌની નજર છે.