પાકિસ્તાનનો પોપટ થઈ ગયો, આવા રક્ષામંત્રી શું કામના, નકલી પીઝા હટનું ઉદ્ઘાટન કર્યું અને ભારે ફજેતી થઈ

સમગ્ર ઘટનામાં પાકિસ્તાનનો જે પોપટ થયો છે તેને લઈને લોકો મોજ લઈ રહ્યા છે. પાકિસ્તાનના સિયાલકોટમાં પિઝા હટનું આઉટલેટ ખુલ્યું જેનું ઉદ્ઘાટન ત્યાંના ડિફેન્સ મિનિસ્ટર ખ્વાજા આસિફે કર્યું. હસતા હસતા રીબન કાપી અને લોકોએ તાળીઓ પાડી. લોકોને એમ લાગ્યું કે વિદેશી કંપનીઓ હવે પાકિસ્તાનમાં આવીને રોકાણ કરી રહી છે.

જોકે જેવી ઉદ્ઘાટનની તસવીરો વાયરલ થઈ કે પિઝા હટ પાકિસ્તાનની ઊંઘ ઊડી ગઈ. કંપની દ્વારા નોટિસ જાહેર કરીને કહેવામાં આવ્યું કે સિયાલકોટમાં જે આઉટલેટ ખુલ્યું છે તે અમારું નથી. ત્યારે આ મામલે સવાલ એ થાય છે કે દેશના રક્ષામંત્રીએ જે બ્રાન્ડના આઉટલેટનું ઉદ્ઘાટન કર્યું શું તેમને ખબર જ ન હતી કે આ આઉટલેટ નકલી છે?

કંપની દ્વારા સ્પષ્ટ કરવામાં આવ્યું કે આ આઉટલેટ નકલી છે અને તેના બ્રાન્ડ સાથે કોઈ લેવા દેવા નથી. અહીંયા તમને પિઝાના નામે શું આપવામાં આવશે તેની કોઈ ગેરંટી નથી. આટલું જ નહીં, કંપનીએ ટ્રેડમાર્ક ચોરીના આરોપને લઈને કાયદેસરની કાર્યવાહી પણ શરૂ કરી દીધી છે. કંપનીએ જણાવ્યું કે પાકિસ્તાનમાં તેના માત્ર 16 આઉટલેટ છે જેમાં 14 લાહોરમાં અને 2 ઇસ્લામાબાદમાં છે.