શિવરાજપુરમાં આ તારીખે યોજાશે મલકુસ્તી, બળવાનોના બળના થશે પારખાં

હિન્દુ-મુસ્લિમ સમાજની એકતાના પ્રતીક સમાન બંને કોમના લોકો અહીં જાગુબસાદાદાને શીશ ઝુકાવતા હોય છે. દ્વારકાથી 10 કિમી દૂર આવેલા મુસ્લિમ સ્થાનક હિન્દુઓનું પણ માનીતું સ્થાન ગણવામાં આવે છે. મેળાનું યુવાઓ અને આજુબાજુના લોકોમાં જબરું આકર્ષણ હોય છે. જેને લઈને બળબળતી ભાદરવીની ગરમી અને તાપ વચ્ચે પણ હજારોની સંખ્યામાં કુસ્તીપ્રેમીઓ ઉમટી પડે છે. મહત્વનું છે કે, રાજાશાહી વખતમાં રાજા પોતાની સેનામાં ભરતી કરવા માટે અંગરક્ષકોની નિમણૂક કરવા માટે મલકુસ્તી મેળાનું આયોજન કરતા હતા. જેમાં જે યુવાનો સારો દેખાવ કરતા તેને રાજ્યની સેનામાં નિયુક્તિ મળતી હતી. જે પરંપરાને આજના સમયમાં પણ અકબંધ રાખી છે.

રમતગમત યુવા અને સાંસ્કૃતિક પ્રવૃત્તિઓ વિભાગ ગાંધીનગર, સ્પોર્ટ ઓથોરિટી ઓફ ગુજરાત ગાંધીનગર દ્વારા હવે આ આયોજન કરવામાં આવે છે. જેમાં ઇનામી વાત કરવામાં આવે તો 8 થી 12 વર્ષની વય જૂથમાં પ્રથમ નંબર મેળવનારને 10,000 રૂપિયા ઉપરાંત દ્વિતીય નંબર મેળવનારને 7,000 રૂપિયા અને તૃતીય નંબર મેળવનારને 5,000 રૂપિયાનો ઇનામ આપવામાં આવશે. વધુમાં 13 થી 17 વર્ષની વય જૂથમાં પણ 10,000, 7,000 અને 5000 રૂપિયા એમ પ્રથમ દ્વિતીય અને તૃતીય નંબર મેળવનારને અપાશે. સાથે જ 18 થી 22 વર્ષની ઉંમરમાં પ્રથમ નંબર મેળવનારને 12,000 દ્વિતીય નંબર મેળવનારને 10,000 અને તૃતીય નંબર મેળવનારને 8,000 રૂપિયા અપાશે. બીજી તરફ 22 થી ઉપરની ઉંમરના વય જૂથમાં પ્રથમ નંબર મેળવનારને 15,000 દ્વિતીય નંબર મેળવનારને 12,000 અને તૃતીય નંબર મેળવનારને 10,000 રૂપિયા ઇનામ પેટે અપાશે. આ ઉપરાંત સમગ્ર સ્પર્ધા દરમિયાન શ્રેષ્ઠ દેખાવ કરનારને 21,151 રૂપિયા જેવું ઇનામ આપવામાં આવશે.