ફળો આપણા સ્વાસ્થ્ય માટે અત્યંત ગુણકારી છે પરંતુ ઘણીવાર બજારમાંથી મોંઘા ભાવે ખરીદેલા ફળો ઘરે લાવ્યા પછી ખાટા કે અંદરથી સૂકા નીકળે છે. બહારથી લાલચોળ કે ચમકદાર દેખાતા ફળો હંમેશા અંદરથી મીઠા જ હોય તે જરૂરી નથી. જો તમે ફ્રુટ શૉપિંગ કરતી વખતે કેટલીક નાની-નાની બાબતોનું ધ્યાન રાખશો તો તમે હંમેશા એકદમ તાજા, મીઠા અને રસદાર ફળો જ પસંદ કરી શકશો.
દાડમ કેવી રીતે ખરીદવા
સારા દાડમ પસંદ કરવા માટે સમાન કદના બે દાડમ હાથમાં લો અને તેના વજનની સરખામણી કરો. જે દાડમ તેના કદની સરખામણીમાં ભારે લાગે છે, તેમાં રસદાર દાણા હોવાની શક્યતા વધુ હોય છે. તમે ફળની ટોચ પર આવેલા ફૂલને જોઈને પણ તેની મીઠાશનો અંદાજ લગાવી શકો છો. તપાસો કે તે ખુલ્લું છે કે બંધ. ખુલ્લું ફૂલ સામાન્ય રીતે મીઠા અને રસદાર દાડમની નિશાની છે.
દ્રાક્ષ કેવી રીતે પસંદ કરવી
સારી અને મીઠી દ્રાક્ષ પસંદ કરવા માટે દ્રાક્ષનો ઝૂમખો ઊંચકો અને તેની દાંડી તપાસો. કથ્થઈ રંગની દાંડી મીઠી અને રસદાર દ્રાક્ષ સૂચવે છે જ્યારે લીલી દાંડી સૂચવે છે કે તેમાં રસ ઓછો હોઈ શકે છે. ઉપરાંત ધ્યાનમાં રાખો કે સારી ગુણવત્તાની દ્રાક્ષ સામાન્ય રીતે કઠણ હોય છે, ઝૂમખા સાથે મજબૂતીથી જોડાયેલી હોય છે અને કરચલીઓ વગરની હોય છે. જો દ્રાક્ષ દબાવવાથી પોચી, ફાટેલી કે ચીકણી લાગે તો તેવો ઝૂમખો ખરીદવાનું ટાળો.
એવોકાડો ખરીદવાની સાચી રીત
સાચું એવોકાડો ઓળખવા માટે તેને તમારી હથેળીમાં મૂકો અને આંગળીઓથી હળવેથી દબાવો. જો તે પથ્થર જેવું કઠણ લાગે તો તે કાચું છે. જો દબાણ આપવાથી તે થોડું દબાય તો તે ખાવા માટે એકદમ તૈયાર છે. આ ઉપરાંત તેની છાલ તપાસો. કથ્થઈ રંગ પાકેલા હોવાની નિશાની છે જ્યારે લીલો રંગ સૂચવે છે કે તે હજુ સંપૂર્ણપણે પાક્યું નથી.
આ પણ વાંચો: બ્રેડ વગર માત્ર બટાકા અને સોજીથી બનાવો ટેસ્ટી અને ક્રિસ્પી નાસ્તો, નોંધી લો ઝટપટ રેસીપી
જામફળ ખરીદવાની રીત
જામફળ મીઠું છે કે નહીં તે જાણવા માટે તેની દાંડી પાસે સૂંઘી જુઓ. જો તેમાંથી હળવી, મીઠી સુગંધ આવતી હોય તો જામફળ પાકેલું છે. તમે તેને દબાવીને પણ તપાસી શકો છો. પાકેલું જામફળ સ્પર્શમાં નરમ લાગશે. તેનાથી વિપરીત જો તે ખૂબ કઠણ લાગે અને તેમાંથી કોઈ સુગંધ ન આવતી હોય તો તે સંપૂર્ણપણે પાકેલું નથી.
આ પણ વાંચો: ડિનરમાં બનાવો ઢાબા સ્ટાઇલ ટેસ્ટી ગાર્લિક કોર્ન પાલકનું શાક, આ રહી સૌથી સરળ રેસીપી
મીઠી નાસપાતી કેવી રીતે પસંદ કરવી
નાસપાતી તપાસવા માટે તેની દાંડી પાસેનો ભાગ દબાવો. જો તે નરમ લાગે તો નાસપાતી રસદાર અને મીઠી હોવાની શક્યતા છે. જો તે કઠણ લાગે તો તે હજુ સંપૂર્ણપણે પાકી નથી.
કેળા ખરીદવા માટેની ટિપ્સ
કેળા પસંદ કરતી વખતે ખૂબ લીલાં હોય તેવાં કેળાં ખરીદવાનું ટાળો. તેના બદલે પીળી છાલવાળાં કેળાં પસંદ કરો. જોકે ખાતરી કરો કે તે ખૂબ કાળાં કે તેના પર વધુ પડતા ડાઘ ન હોય.
