ગુજરાતીઓને ‘અભણ’ કહેતા મલ્લિકાર્જુન ખડગે પર સીએમ ભૂપેન્દ્ર પટેલ અને ભાજપના આકરા પ્રહાર

રવિવારે કેરળના ઇડુક્કીમાં વિધાનસભા ચૂંટણી માટે પ્રચાર કરતી વખતે કોંગ્રેસ પ્રમુખ મલ્લિકાર્જુન ખડગેએ આપેલા નિવેદનથી મોટો વિવાદ સર્જાયો છે. ભાજપે આરોપ લગાવ્યો છે કે કોંગ્રેસ પ્રમુખ મલ્લિકાર્જુન ખડગેએ ગુજરાત અને અન્ય ઉત્તર ભારતીય રાજ્યોના લોકોને ‘અશિક્ષિત’ ગણાવીને તેમનું અપમાન કર્યું છે. વધુમાં ભાજપે ભારપૂર્વક જણાવ્યું હતું કે ખડગેને કડક જવાબનો સામનો કરવો પડશે જે તેમને જનતા પોતે આપશે.

રવિવારે કેરળમાં તેમના વિધાનસભા ચૂંટણી પ્રચાર દરમિયાન એક સભાને સંબોધતા ખડગેએ કહ્યું, “મોદીજી કેરળના લોકોને ગેરમાર્ગે ના દોરો. કેરળના લોકો ખૂબ જ હોશિયાર અને શિક્ષિત છે. મોદીજી અને વિજયન, તમે બંને ગુજરાત અથવા અન્ય સ્થળોના અશિક્ષિત લોકોને મૂર્ખ બનાવી શકો છો પરંતુ તમે કેરળના લોકોને મૂર્ખ બનાવી શકતા નથી.” ખડગેએ એવો પણ આરોપ લગાવ્યો કે LDF અને BJP સાથે મળીને કામ કરી રહ્યા છે.

ભાજપે કહ્યું- આ ‘ભાગલા પાડો અને રાજ કરો’ ની રાજનીતિ છે

ખડગેના નિવેદનથી રાજકીય ગરમાવો આવી ગયો છે. રવિવારે ભાજપે આરોપ લગાવ્યો કે કોંગ્રેસ પ્રમુખ મલ્લિકાર્જુન ખડગેએ ગુજરાત અને અન્ય ઉત્તર ભારતીય રાજ્યોના લોકોને અશિક્ષિત ગણાવીને તેમનું અપમાન કર્યું છે. ભાજપે વિધાનસભા ચૂંટણી પહેલા કોંગ્રેસ પર ‘ભાગલા પાડો અને રાજ કરો’ ની રાજનીતિ કરવાનો આરોપ લગાવ્યો.

સુધાંશુ ત્રિવેદીનો કટાક્ષ: હું રાહુલ ગાંધી વિશે પૂછવા માંગતો નથી

કોંગ્રેસ પર કટાક્ષ કરતા ભાજપના રાષ્ટ્રીય પ્રવક્તા સુધાંશુ ત્રિવેદીએ ટિપ્પણી કરી, “હું રાહુલ ગાંધી વિશે કંઈ પૂછવા માંગતો નથી કારણ કે આખો દેશ તેમને પહેલાથી જ સારી રીતે જાણે છે.” તેમણે કહ્યું કે, “કેરળના લોકો ખરેખર સમજદાર અને શિક્ષિત છે. જોકે કોંગ્રેસ અને ડાબેરી પક્ષોએ ક્યારેય તેમની સાથે ન્યાય કર્યો નથી. કેરળના લોકોની શાણપણને કારણે જ 45 વર્ષના ડાબેરી શાસન પછી ભાજપ તિરુવનંતપુરમમાં નાગરિક સંસ્થાની ચૂંટણી જીતવામાં સફળ રહી છે.”

વડોદરાના મહારાણી રાધિકારાજે ગાયકવાડનો રૉયલ અંદાજ, ઇકત સિલ્ક અને આશાવાલી સાડીમાં જીત્યું સૌનું દિલ

ખડગેના નિવેદન પર પ્રતિક્રિયા આપતા ગુજરાતના મુખ્યમંત્રી ભૂપેન્દ્રભાઈ પટેલે સોશિયલ મીડિયા પર લખ્યું,”કોંગ્રેસના રાષ્ટ્રીય અધ્યક્ષ શ્રી મલ્લિકાર્જુન ખડગેજી દ્વારા ગુજરાતના લોકો અંગે આપવામાં આવેલા નિવેદનો ખૂબ જ વાંધાજનક અને દુર્ભાગ્યપૂર્ણ છે. આવી ટિપ્પણીઓ માત્ર ગુજરાતના 6 કરોડ રહેવાસીઓનું અપમાન જ નથી કરતી પરંતુ મહાત્મા ગાંધી અને સરદાર પટેલની પવિત્ર ભૂમિની ગરિમાને પણ ઊંડી ઠેસ પહોંચાડે છે.”

‘કોંગ્રેસ અસ્વસ્થ અને અસુરક્ષિત અનુભવે છે’

તેમણે આગળ લખ્યું: “ગુજરાત હંમેશા રાષ્ટ્ર નિર્માણ, વિકાસ અને એકતામાં અગ્રણી ભૂમિકા ભજવતું આવ્યું છે, અને આગળ પણ ભજવતું રહેશે. આવા નિવેદનો કોંગ્રેસ પક્ષની સંકુચિત માનસિકતા દર્શાવે છે. આ ટિપ્પણીઓ સ્પષ્ટપણે દર્શાવે છે કે આપણા વડા પ્રધાન નરેન્દ્ર મોદીજીના નેતૃત્વ હેઠળના ભાજપની વિકાસની રાજનીતિ અને તેને મળી રહેલા વ્યાપક જાહેર સમર્થન સામે કોંગ્રેસ કેટલી અસ્વસ્થ અને અસુરક્ષિત અનુભવે છે. ગુજરાતના જાગૃત લોકો જાણે છે કે આવા નિવેદનોનો જવાબ કેવી રીતે આપવો. વધુમાં એ ચોક્કસ છે કે આવનારા સમયમાં કેરળના લોકો પણ કોંગ્રેસને નકારી કાઢશે અને ભાજપની વિકાસની રાજનીતિને ટેકો આપશે.”