અમદાવાદ: ઠંડી વધતા પૂર્વ વિસ્તારોમાં ઘરફોડ ચોરીના બનાવ બન્યા, જર્મન શેફર્ડ શ્વાનને રૂમમાં બંધ કરી તસ્કરોએ ચોરી કરી

નરોડામાં રહેતા કૃણાલભાઈ ચાવડા ગાંધીનગર ખાતે નાગરિક પુરવઠા વિભાગમાં ડ્રાઇવિંગની નોકરી કરે છે. જેમાં તેમણે એક જર્મન શેફર્ડ પાલતુ શ્વાન રાખ્યું છે. કૃણાલભાઈ બહારગામ જાય ત્યારે સંબંધીને શ્વાનને જમવાનું અને ફરાવવાનું કહીને જતા હોય છે. આ ઉપરાંત મકાનની ચાવી બહાર મૂકેલા બૂટમાં રાખીને જતા હોય છે. ગત 18 જાન્યુઆરીએ તે પરિવાર સાથે ગોવા જવા માટે નીકળ્યા હતા. અને તેમના શ્વાનને ગત 23 જાન્યુઆરીએ પાડોશમાં રહેતા સંબંધી કૃણાલભાઈના શ્વાનને જમવાનું આપવા આવ્યો હતો. ત્યારે ઘરમાં જતા જ બધો સામાન વેરવિખેર હાલતમાં પડ્યો હતો. તદુપરાંત કૃણાલભાઈના પાલતુ શ્વાન દેખાયું નહીં પરંતુ બંધ રૂમમાંથી ભસવાનો અવાજ આવતા રૂમ ખોલીને જોતા શ્વાનને રૂમમાં પૂરીને રાખ્યો હતો. એટલે ખ્યાલ આવ્યો કે તસ્કરોએ શ્વાનને રૂમમાં બંધ કરીને ચોરીને અંજામ આપ્યો છે. બીજી તરફ આ તમામ પરિસ્થિતિ જોતા પાડોશી સંબંધીએ મકાનના માલિક કૃણાલને ફોન કરીને બનાવ અંગેની જાણ કરતા તેઓ તાત્કાલિક ઘરે આવ્યા અને જોતા તિજોરીમાં રહેલા રોકડ અને સોના-ચાંદીના દાગીના સહિત કુલ રૂ.6.54 લાખની મત્તાની ચોરી થઈ હોવાનું જાણવા મળ્યું હતું. સમગ્ર મામલે નરોડા પોલીસે ગુનો નોંધીને તપાસ શરૂ કરી છે.

નારોલમાં રહેતા અર્જુનભાઈ બગથરિયા હેર સલૂનની દુકાન ધરાવી ધંધો કરે છે. ગત 23 જાન્યુઆરીએ તે પુત્રને ગોતા સાસરીમાં રોકાવા ગયા હતા. બીજા દિવસે આવ્યા ત્યારે ઘરમાં રહેલા દરવાજાનો નકુચો તૂટેલો હતો અને તિજોરીમાં રહેલા રોકડ અને સોના-ચાંદીના દાગીના સહિત કુલ રૂ.5.32 લાખની મત્તાની ચોરી કરી તસ્કરો ફરાર થઈ ગયા હતા. આ અંગે અર્જુનભાઈએ નારોલ પોલીસ સ્ટેશનમાં ફરિયાદ નોંધાવી છે.