ગ્રેટર નોઈડાના રબુપુરા વિસ્તારના એક ગામમાં શનિવારે સવારે એક જ પરિવારના પાંચ સભ્યો તેમના ઘરમાં મૃત હાલતમાં મળી આવ્યા હતા. મૃતકોમાં ત્રણ બાળકોનો સમાવેશ થાય છે. પોલીસે જણાવ્યું હતું કે આ કેસ શંકાસ્પદ ફૂડ પોઇઝનિંગનો લાગી રહ્યો છે. સ્થાનિકો અને પરિવારના સભ્યોએ દાવો કર્યો હતો કે શુક્રવારે રાત્રે પરિવારે નૂડલ્સ ખાધા હતા.
મૃતકોની ઓળખ મહેશ (37), તેની પત્ની લલિતા (35), 11 વર્ષીય પુત્ર લડ્ડુ, 3 વર્ષીય સશક્ત અને 7 વર્ષની પુત્રી મિષ્ટી તરીકે થઈ છે. આ ઘટના નાગલા શ્રી પદમ ગામમાં બની હતી. રહેવાસીઓ અને મહેશની માતાના જણાવ્યા અનુસાર પરિવારે શુક્રવારે રાત્રે નૂડલ્સ ખાધા હતા અને બીજા દિવસે સવારે તેઓ મૃત હાલતમાં મળી આવ્યા હતા. પોલીસે જણાવ્યું હતું કે મોતનું ચોક્કસ કારણ હજુ સુધી જાણી શકાયું નથી. પોસ્ટમોર્ટમ રિપોર્ટ અને અન્ય વૈજ્ઞાનિક પુરાવાના આધારે આગળની કાર્યવાહી કરવામાં આવશે.
પરિવારે શું કહ્યું?
મૃતક બાળકોના મામા સોનુએ સમાચાર એજન્સી આઈએએનએસને જણાવ્યું હતું કે મારો નાનો ભાઈ અહીં કામ માટે આવ્યો હતો. તેણે કહ્યું કે બહેનના ઘરે જઈને તેમના હાલચાલ પૂછીએ. તે રબુપુરામાં કામ કરવા આવ્યો હતો. જ્યારે તે પહોંચ્યો ત્યારે તેણે જોયું કે ત્યાંની પરિસ્થિતિ ખૂબ જ ખરાબ હતી. મૃત્યુ પામેલા પાંચ લોકોમાં અમારા સંબંધી મહેશ, અમારી બહેન લલિતા, અમારી ભત્રીજી અને અમારા બે ભત્રીજા હતા.
ગ્રેટર નોઈડાના ડીસીપીનું નિવેદન
ગ્રેટર નોઈડાના ડીસીપી શ્રવણ કુમાર સિંહે કહ્યું કે આ ઘટના રબુપુરા પોલીસ સ્ટેશન વિસ્તારમાં બની છે. આ ખૂબ જ દુઃખદ ઘટના છે. એક જ પરિવારના પાંચ સભ્યો – પતિ, પત્ની અને તેમના ત્રણ બાળકોનું મોત થયું છે. તેઓએ રાત્રે 10 વાગ્યે ભોજન કર્યું હતું. જ્યારે એક બાળક સવારે પરીક્ષા માટે ઉઠ્યો નહીં ત્યારે આ વાત સામે આવી હતી.
અભિજીત દિપકેને શરતી જામીન મળ્યા, શાંતિ જાળવવા બોન્ડ પર સહી કરાવી
તેમણે કહ્યું કે અમે એમ્બ્યુલન્સ અને અન્ય ટીમો સાથે ઘટના સ્થળે દોડી ગયા હતા. મૃતદેહોને પોસ્ટમોર્ટમ માટે મોકલવામાં આવ્યો છે. તેમણે જે ખાધું તેના આધારે અમે આગળની કાર્યવાહી કરી રહ્યા છીએ અને વધુ વિગતવાર તપાસ કર્યા પછી આગળની કાર્યવાહી કરવામાં આવશે.
