Akki Roti Recipe : ભારતમાં લગભગ દરેક ઘરમાં રોટલીનું સેવન કરવામાં આવે છે. જેમને ઘઉંના લોટની રોટલી પસંદ નથી તે બીજા અનાજના લોટમાંથી બનેલી રોટલી ખાય છે. ખાસ કરીને ઉત્તર ભારતમાં લોકો બપોરના ભોજનથી લઈને રાત્રિભોજન સુધી નિયમિતપણે રોટલી ખાય છે. પરંતુ સતત એક જ સ્વાદ ખાવાથી લોકો તેનાથી કંટાળી શકે છે. આવી સ્થિતિમાં કંઈક નવા અને સ્વાદિષ્ટ સાથે હેલ્ધી વિકલ્પ શોધે છે. જો તમે પણ રોજ ઘઉંની રોટલી ખાઈને કંટાળી ગયા હોવ તો તેના બદલે ‘અક્કી રોટી’ બનાવી શકો છો.
આ રોટલી દક્ષિણ ભારતમાં ખાસ કરીને કર્ણાટકમાં લોકપ્રિય છે. કન્નડમાં ચોખાને ‘અક્કી’ કહેવામાં આવે છે. ચોખાના લોટમાંથી બનાવવામાં આવતી આ રોટલીમાં ડુંગળી, લીલા મરચાં, ધાણા અને છીણેલા ગાજર અથવા કાકડી જેવા શાકભાજી ઉમેરવામાં આવે છે. આ શાકભાજી રોટલીને નરમ અને પૌષ્ટિક બનાવે છે.
તેનો લોટને કેળાના પાન અથવા બટર પેપર પર હાથથી ફેલાવવામાં આવે છે અને તવા પર રાંધવામાં આવે છે. રોટલી બહારથી ક્રિસ્પી અને અંદરથી નરમ હોય છે. તેને નાળિયેરની ચટણી, મગફળીની ચટણી અથવા કોઈપણ તીખી કરી સાથે પીરસી શકાય છે. તેને નાસ્તામાં, લંચથી લઇને ડિનર સુધી ખાઈ શકાય છે. ચાલો જાણીએ તેની સરળ રેસીપી શું છે.
અક્કી રોટી બનાવવા માટેની સામગ્રી (4-5 રોટલી માટે)
- 1 કપ ચોખાનો લોટ
- અડધો કપ ઝીણી સમારેલી ડુંગળી
- 2 લીલા મરચાં, ઝીણી સમારેલી
- 2 ચમચી છીણેલું નાળિયેર (વૈકલ્પિક)
- 2 ચમચી સમારેલા ધાણા
- થોડાક કરી પત્તા, બારીક કાપેલા
- અડધી ચમચી જીરું
- અડધો કપ છીણેલું ગાજર અથવા ખીરા (વૈકલ્પિક, નરમ બનાવવા માટે)
- મીઠું સ્વાદ પ્રમાણે
- તેલ અથવા ઘી
- પાણી
સ્વાદીષ્ટ અને પૌષ્ટિક ખાવા માંગો છો તો તિબેટીયન સ્ટાઇલમાં બનાવો વેજ થુકપા
અક્કી રોટલી બનાવવાની સરળ રેસીપી
- એક બાઉલમાં ચોખાનો લોટ, ડુંગળી, લીલા મરચાં, છીણેલું નાળિયેર, શાકભાજી, કોથમીર, કરી પત્તા અને જીરૂ ઉમેરો અને સારી રીતે મિક્સ કરો.
- તેમાં સ્વાદ અનુસાર મીઠું ઉમેરો અને પછી મિક્સ કરો. હવે ધીમે ધીમે પાણી ઉમેરી નરમ લોટ બાંધી લો.
- કેળાના પાન, બટર પેપર અથવા ચોખ્ખું કપડું લો. તેને થોડું તેલ અથવા ઘી વડે ગ્રીસ કરો અને તેની પર લોટનો થોડો ભાગ મૂકો.
- આંગળીઓને પાણીથી ભીની કરો અને લોટને ધીમે-ધીમે દબાવતા પાતળી ગોળ રોટલીમાં આકાર આપો.
- જો તમે સીધા તવા પર બનાવવા માંગતા હો તો ઠંડા તલાને ગ્રીસ કરો અને તેની પર લોટ પાથરી રોટલીનો આકાર આપો.
- તવો ગરમ કરો અને રોટીને મધ્યમ તાપ પર મૂકો. 2-3 મિનિટ સુધી પકાવો અને કિનારી પર થોડું તેલ અથવા ઘી નાખો. રોટલીને પલટાવી બન્ને તરફ ગોલ્ડન અને હળવી ક્રિસ્પી થાય ત્યાં સુધી શેકી લો.
- તૈયાર થયેલી ગરમા ગરમ અક્કી રોટલીને નાળિયેરની ચટણી, મગફળીની ચટણી અથવા કોઈપણ ગ્રેવી શાકભાજી સાથે પીરસો.
