Video: દ્વારકા પદયાત્રામાં અનંત અંબાણી સાથે બાબા બાગેશ્વર પણ ખુલ્લા પગે જોડાયા

બાબા બાગેશ્વરે શું કહ્યુ?

દ્વારકાધીશ પર અનંત શ્રદ્ધા ધરાવતા રિલાયન્સ ઈન્ડસ્ટ્રીઝ લિમિટેડના ડાયરેક્ટર અનંત અંબાણીની પદયાત્રામાં બાબા બાગેશ્વર પણ જોડાયા. બાબા બાગેશ્વરે અનંત અંબાણી સાથે ખુલ્લા પગે અને જુસ્સા સાથે પદયાત્રામાં જોડાયા. આ પદયાત્રા દરમિયાન બાબા બાગેશ્વર સાથે ન્યૂઝ18 ગુજરાતીના સંવાદદાતા સાથે પણ ખાસ વાતચીત કરી હતી. જેમાં તેમણે જણાવ્યું હતું કે, “મારા પ્રિય મિત્ર અનંત અંબાણી ભક્તિ, આસ્થા અને આધ્યાત્મિકતાની સાથે સનાતન સંસ્કૃતિની પદયાત્રા કરી રહ્યા છે. હું મારી દિલ્હીથી વ્રજ સુધીની નિર્ધારિત પદયાત્રા પહેલા દ્વારકા પદયાત્રામાં આવ્યો છું.”

આ સાથે તેમણે એમ પણ જણાવ્યું છે કે, “જેમને દ્વારકાધીશ ભગવાન બોલાવે છે તે જ દ્વારકા જઈ શકે છે. ભગવાનને તેમના ભક્તને બોલાવ્યા છે. અમારા પ્રિય અનંત અંબાણી બધાને લઈને જઈ રહ્યા છે. સનાતન સંસ્કૃતિ સાથે તેમનું પહેલાથી જ જોડાણ છે. તેઓ કોઈપણ કામ કરે છે ત્યારે પહેલા જ દેવી-દેવતાઓ પ્રત્યેનું સમર્પણ દેખાય છે. એટલે જ ભગવાનનો વિશેષ પ્રેમ તેમની પર છે.”

અનંત અંબાણીએ મીડિયા સાથે વાત કરતા જણાવ્યું કે તેઓ કોઈપણ કાર્ય શરૂ કરતા પહેલા હંમેશા ભગવાન દ્વારકાધીશને યાદ કરે છે. તેમણે કહ્યું, “આ પદયાત્રા જામનગરમાં અમારા ઘરથી દ્વારકા સુધીની છે. મારી પદયાત્રા ચાલી રહી છે. ભગવાન દ્વારકાધીશ આપણને આશીર્વાદ આપે. હું યુવાનોને કહેવા માંગુ છું કે, ભગવાન દ્વારકાધીશમાં શ્રદ્ધા રાખો અને કોઈપણ કાર્ય કરતા પહેલા ભગવાન દ્વારકાધીશના આશીર્વાદ લો. તે કાર્ય ચોક્કસપણે કોઈપણ અવરોધ વિના પૂર્ણ થશે અને જ્યારે ભગવાન હાજર હશે, ત્યારે ચિંતા કરવાની કોઈ વાત નથી.”