જમ્મુ-કાશ્મીરના પૂંછ જિલ્લામાં સુરક્ષા કર્મચારીઓએ એક શંકાસ્પદ આતંકી ઠેકાણાનો પર્દાફાશ કર્યો છે. મંગળવારે અધિકારીઓને પૂંછ જિલ્લાના સુરનકોટ વિસ્તારમાં શંકાસ્પદ આતંકી ગતિવિધિઓ વિશે માહિતી મળી હતી, ત્યારબાદ આ વિસ્તારમાં સર્ચ ઓપરેશન શરૂ કરવામાં આવ્યું હતું. આ દરમિયાન સુરક્ષાકર્મીઓને કોઈ આતંકી મળ્યો ન હતો, પરંતુ એક ગુફામાંથી હથિયાર અને હેન્ડ ગ્રેનેડ મળી આવ્યા હતા.
અધિકારીઓ દ્વારા આપવામાં આવેલી માહિતી અનુસાર ગુફામાંથી મળી આવેલી વસ્તુઓમાં એકે-47 રાઇફલ, 30 રાઉન્ડ ગોળીઓ, 6 ગ્રેનેડ, બેન્ડેજ, બેટરી, ફ્લેશલાઇટ અને મેડિકલ સામગ્રીનો સમાવેશ થાય છે. આ દરમિયાન કેટલીક ખાદ્ય ચીજો પણ મળી આવી છે.
સેના અને પોલીસના સંયુક્ત અભિયાનમાં સફળતા
અધિકારીઓએ જણાવ્યું હતું કે આ વિસ્તારમાં શંકાસ્પદ હિલચાલની માહિતી બાદ સથરાબાણના જંગલોમાં સેના અને પોલીસ દ્વારા હાથ ધરવામાં આવેલા સંયુક્ત સર્ચ ઓપરેશન દરમિયાન આ હથિયારો મળી આવ્યા હતા. તેમણે જણાવ્યું હતું કે ઘટના સ્થળેથી કોઈની ધરપકડ કરવામાં આવી નથી.
આ જિલ્લાઓમાં પણ સર્ચ ઓપરેશન શરૂ
અધિકારીઓએ જણાવ્યું હતું કે શંકાસ્પદ હિલચાલની માહિતી બાદ ઉધમપુર અને કઠુઆ જિલ્લામાં પણ સર્ચ ઓપરેશન શરૂ કરવામાં આવ્યું હતું. આ જિલ્લાઓના ઉપરના વિસ્તારોમાં સર્ચ ઓપરેશન હાથ ધરવામાં આવ્યું હતું. તેમણે જણાવ્યું હતું કે ઉધમપુરના મજાલતા સ્થિત સોઆન, ખુબાન, ચોર અને નાગાન અને કઠુઆ જિલ્લાના સદરૌતા, ભેડ અને બાલોરના જંગલ વિસ્તારોમાં સોમવાર સાંજથી સેના અને પોલીસનું સંયુક્ત ઓપરેશન ચાલી રહ્યું છે.
કોંગ્રેસના કેરળ એકમે X પર ચીફ જસ્ટિસ સૂર્યકાંતના રાજીનામાની માંગ કરી, પાર્ટીએ કહ્યું હતું કે – અમે તમારો વિકલ્પ શોધી લઇશું
બે લેન્ડમાઈન મળી આવ્યા
અધિકારીઓએ જણાવ્યું હતું કે શંકાસ્પદ લોકોનો હજી સુધી આમનો સામનો થયો નથી. અધિકારીઓએ જણાવ્યું હતું કે એક અલગ ઘટનામાં સેનાના જવાનોએ મંગળવારે સવારે પૂંછના મેંઢર સેક્ટરના બાસોની વિસ્તારમાં સરહદી વાડ નજીક બે કાટવાળા લેન્ડમાઇન શોધી કાઢ્યા હતા.
12થી વધુ સુરંગ નષ્ટ કરવામાં આવી
અધિકારીઓએ જણાવ્યું હતું કે ટ્રેક બાંધકામના કામ દરમિયાન સુરંગો દેખાતી હતી, જે બાદમાં સેનાના નિષ્ણાતો દ્વારા નિયંત્રિત વિસ્ફોટથી નષ્ટ કરી હતી. છેલ્લા એક અઠવાડિયામાં આ ક્ષેત્રમાં સેના દ્વારા 12થી વધુ સુરંગો શોધી કાઢવામાં આવી છે અને તેને નિષ્ક્રિય કરવામાં આવી છે.
