ભાયલી સામૂહિક દુષ્કર્મ કેસમાં ન્યાયની આતુરતાનો અંત આવ્યો છે. પોક્સો કોર્ટે આ કેસના તમામ 5 દોષિતોને આજીવન કેદની આકરી સજા સંભળાવી છે. વર્ષ 2024માં નવરાત્રીના સમયે બનેલી આ ઘટનામાં વિશેષ સરકારી વકીલ દ્વારા કડકમાં કડક સજાની માંગ કરવામાં આવી હતી.
આ ઘટના 4 ઓક્ટોબર, 2024 ની રાત્રે બની હતી જ્યારે સગીર પીડિતા ગરબા કાર્યક્રમમાંથી પરત ફર્યા પછી એક પુરુષ મિત્ર સાથે શહેરના બહારના વિસ્તારમાં એકાંત સ્થળે ગઈ હતી. ફરિયાદ પક્ષના જણાવ્યા અનુસાર, પાંચેય આરોપીઓએ તે સ્થળે તેણીને નિશાન બનાવીને તેના પર ગેંગરેપ કર્યો હતો.
આ પણ વાંચો: દમણ બીચ પર દરિયામાં ડૂબતી 7 વર્ષની માસૂમ બાળકી માટે લાઈફગાર્ડ બન્યો દેવદૂત, જુઓ રેસ્ક્યૂનો લાઈવ વીડિયો
પાંચેય આરોપીઓ માટે 22 મહિનાની ટ્રાયલનો અંત
લગભગ 22 મહિના ચાલેલા ટ્રાયલ બાદ 20 ઓગસ્ટના રોજ ખાસ POCSO કોર્ટે પાંચેય આરોપીઓને દોષિત ઠેરવ્યા હતા. સજા અંગે દલીલો 22 ઓગસ્ટના રોજ કોર્ટમાં થઈ હતી. બધા દોષિતોને વીડિયો કોન્ફરન્સિંગ દ્વારા કોર્ટ સમક્ષ રજૂ કરવામાં આવ્યા હતા. આજે 31 ઓગસ્ટના રોજ તમામ આરોપીઓને આજીવન કેદની સજા સંભળાવવામાં આવી છે.
જિલ્લા સરકારી વકીલ અનિલ દેસાઈએ કોર્ટમાં રજૂઆત કરી હતી કે, ગુનાની ગંભીરતાને ધ્યાનમાં રાખીને આરોપીને કાયદા હેઠળ મહત્તમ સજા આપવી જોઈએ. તેમણે જણાવ્યું હતું કે રાજ્યએ મૃત્યુદંડની માંગ કરી છે પરંતુ જો કોર્ટ તે યોગ્ય ન માને તો દોષિતોને તેમના છેલ્લા શ્વાસ સુધી કેદની સજા ફટકારવી જોઈએ.
