સ્વરાજ્યની ચૂંટણી પૂર્વે યુથ કોંગ્રેસ ગુજરાત ધમરોળશે, 20% બેઠકોમાં દાવેદારી મેળવવા મેદાને! 

આ પ્રવાસમાં રાષ્ટ્રીય સચિવ નિખીલ ત્રિવેદી તેમજ ગુજરાત યુથ કોંગ્રેસના પ્રદેશ પ્રમુખ ડો. પ્રવિણસિંહ વણોલ સહિતના આગેવાનો ગુજરાતમાં પ્રત્યેક જિલ્લા, તાલુકા તેમજ વિધાનસભાની બેઠક વાઇઝ પ્રવાસની રૂપરેખા ઘડવામાં આવી છે. આગામી સ્થાનિક સ્વરાજ્યની ચૂંટણી માટે યુથ કોંગ્રેસને પ્રાધાન્ય મળે તે માટે સક્રિય બન્યું છે. જેના ભાગરૂપે આવતીકાલથી ત્રણ ફેબ્રુઆરી સુધી કોંગ્રેસ જિલ્લા મથકે જશે, પ્રત્યેક જિલ્લામાં રોકાણ કરશે અને તાલુકા પંચાયત, જિલ્લા પંચાયતની ચૂંટણી માટે યુવા ઉમેદવારને શોધવાની તજવીજ હાથ ધરશે.

મહત્વનું છે કે, આગામી ચૂંટણીમાં યુથ કોંગ્રેસને 20 % પ્રાધાન્ય મળે તે માંગ સાથે મેદાને ઉતરવાની રણનીતિ બનાવી છે, એટલું જ નહીં દરેક જિલ્લામાં યુથ કોંગ્રેસ કારોબારી બેઠક કરશે અને કારોબારી બેઠકમાં યુવાન અને લડાકુ ઉમેદવારને શોધશે. જે ભાજપને સીધી ટક્કર આપી શકે તેવા ઉમેદવારોને શોધીને સ્થાનિક સ્વરાજ્યની ચૂંટણી માટેની રણનીતિ બનાવશે. જેમાં યુથ કોંગ્રેસના બધા નેતાઓ રાજ્યમાં સક્રિય પણ કરશે. સ્થાનિક સ્વરાજ્યની ચૂંટણીમાં યુવાનોને પ્રાધાન્ય મળે તે પ્રકારની આશા અપેક્ષા સાથે કામે લાગશે. ત્યારે એક તરફ ભાજપ પણ યુવાનોને પ્રમોટ કરી રહ્યું છે, ભાજપ પોતાના સંગઠનની ટીમમાં પણ યુવાનોને મેદાને ઉતાર્યા છે. ત્યારે હવે કોંગ્રેસ પણ યુવાનોને પ્રાધાન્ય માટે યુથ કોંગ્રેસના યુવાનો આગળ કરી રહ્યું છે. ત્યારે યુથ કોંગ્રેસના યુવાનો સ્થાનિક સ્વરાજ્યની ચૂંટણીમાં કેટલું કાઠું કાઢે છે તે જોવું રહેશે.