મન કી બાત કાર્યક્રમમાં PM મોદીએ દેશના યુવાઓને આપ્યો એક ખાસ સંદેશ, ભારતીય સંસ્કૃતિ અને તહેવારોનો કર્યો ઉલ્લેખ

PM મોદીએ કહ્યું કે, આ દિવસોમાં હું સોશિયલ મીડિયા પર એક મજેદાર ટ્રેન્ડ જોઈ રહ્યો છું. લોકો 2016ની પોતાની યાદોને તાજી કરી રહ્યા છે. હું પણ આજે આપ સૌ સાથે પોતાની એક યાદ શેર કરવા માંગું છું. આજથી 10 વર્ષ પહેલાં આપણે એક શરૂઆત કરી હતી. જે યાત્રાની વાત હું કરી રહ્યો છું, તે સ્ટાર્ટઅપ ઇન્ડિયાની જર્ની છે. આના હીરો આપણા યુવા સાથીઓ છે, જેમણે પોતાના કમ્ફર્ટ ઝોનમાંથી બહાર નીકળીને જે ઇનોવેશન કર્યા, તે ઇતિહાસમાં નોંધાઈ રહ્યા છે. આજે ભારતમાં વિશ્વનું ત્રીજું સૌથી મોટું સ્ટાર્ટઅપ ઇકોસિસ્ટમ બની રહ્યું છે. એઆઈ, સ્પેસ, પરમાણુ ઊર્જા, સેમીકન્ડક્ટર, ગ્રીન હાઇડ્રોજન – જે પણ સેક્ટરનું નામ લો, તે બધામાં ભારતીય સ્ટાર્ટઅપ કામ કરી રહ્યા છે. હું તે યુવા સાથીઓને સલામ કરું છું જેઓ સ્ટાર્ટઅપ સાથે જોડાયેલા છે અથવા શરૂ કરવા માંગે છે.

તેમણે કહ્યું કે, હું યુવાનોને એક આગ્રહ કરવા માંગું છું કે ભારતની અર્થવ્યવસ્થા ઝડપથી આગળ વધી રહી છે. આવી સ્થિતિમાં આપણા બધા પર એક મોટી જવાબદારી છે, તે છે ગુણવત્તા (ક્વોલિટી) પર ભાર મૂકવાની. ‘ચાલે છે’ વાળો યુગ પૂરો થઈ ગયો છે. આ વર્ષે આપણે પૂરી તાકાતથી ગુણવત્તાને મહત્વ આપીએ અને ફક્ત ગુણવત્તા પર ધ્યાન કેન્દ્રિત કરીએ. જે પણ આપણે બનાવીએ છીએ, તેની ગુણવત્તા (ક્વોલિટી) સુધારવાનો સંકલ્પ લઈએ. ભારતીય ઉત્પાદનોની ઓળખ જ ગુણવત્તા (ક્વોલિટી) હોવી જોઈએ.

પીએમ મોદીએ કહ્યું કે, આપણા દેશના લોકો ખૂબ જ ઇનોવેટિવ છે. સમસ્યાઓનું નિરાકરણ શોધવું એ દેશવાસીઓના લોહીમાં છે. કેટલાક લોકો સ્ટાર્ટઅપ દ્વારા કરે છે તો કેટલાક સમાજની સામૂહિક ભાગીદારીથી. એવો જ એક પ્રયાસ ઉત્તર પ્રદેશના આઝમગઢમાં જોવા મળ્યો, જ્યાં સ્થાનિક લોકોએ તમસા નદીને નવું જીવન આપ્યું છે. અયોધ્યાથી નીકળીને ગંગામાં સમાઈ જતી આ નદી એક સમયે આ વિસ્તારના લોકોના જીવનનું કેન્દ્ર હતી, પરંતુ પ્રદૂષણે આ નદીના પ્રવાહને રોકી દીધો હતો. ત્યારબાદ લોકોએ નદીની સફાઈ કરી, કિનારા પર છાંયદાર વૃક્ષો રોપ્યા અને સૌના પ્રયાસથી નદીનું પુનરુત્થાન થયું.

એવી જ રીતે આંધ્ર પ્રદેશના અનંતપુરમાં પાણીની અછત દૂર કરવા માટે સ્થાનિક લોકોએ જળાશયોને સાફ કરવાનું લક્ષ્ય રાખ્યું અને પછી વહીવટી તંત્રના સહયોગથી ‘અનંત નીરું’ સંરક્ષણ પ્રોજેક્ટની શરૂઆત થઈ. આ પ્રયાસ હેઠળ 10થી વધુ જળાશયોને જીવનદાન મળ્યું છે. સાથે જ 7000થી વધુ વૃક્ષો પણ રોપાયા છે. અનંતપુરમાં જળ સંરક્ષણ સાથે સાથે ગ્રીન કવર પણ વધ્યું છે. જન-ભાગીદારી અને સામૂહિકતા જ દેશની તાકાત છે.

આપણે મંદિરોમાં ભજન સાંભળ્યા છે અને દરેક યુગમાં ભક્તિને પોતાના સમય અનુસાર જીવી છે. આજના યુવાનોએ ભક્તિને પોતાના અનુભવ અને જીવનશૈલીમાં ઢાળી લીધી છે. જેનાથી નવો સાંસ્કૃતિક ચળવળ સામે આવી છે, જેમાં યુવાનો ભેગા થાય છે, ત્યાં સંગીત હોય છે, રોશની હોય છે અને કન્સર્ટ જેવા માહોલમાં ભક્તિભાવથી ભજન ગવાય છે. તેને ‘ભજન ક્લબિંગ’ કહેવામાં આવે છે, જે જનરેશન Zમાં લોકપ્રિય થઈ રહ્યું છે. સારી વાત એ છે કે આ ભજન ક્લબિંગમાં ભક્તિભાવને હળવાશમાં લેવામાં આવતો નથી અને ન તો શબ્દોની મર્યાદા તોડવામાં આવે છે.

મારા પ્રિય દેશવાસીઓ, આજે આપણી સંસ્કૃતિ અને તહેવારો વિશ્વભરમાં પોતાની ઓળખ બનાવી રહ્યા છે. વિશ્વના દરેક ખૂણામાં ભારતના તહેવારો મોટા ઉત્સાહ અને ઉલ્લાસ સાથે ઉજવાય છે. દરેક પ્રકારની સાંસ્કૃતિક વિવિધતાને જાળવી રાખવામાં આપણા ભારતવંશી ભાઈ-બહેનોનું મહત્વનું યોગદાન છે. તેઓ જ્યાં પણ છે ત્યાં પોતાની સંસ્કૃતિની મૂળ ભાવનાને સંરક્ષિત કરીને તેને આગળ વધારી રહ્યા છે. તમને આ જાણીને આનંદ અને આશ્ચર્ય થશે કે મલેશિયામાં 500થી વધુ તમિલ શાળાઓ છે. આમાં તમિલ ભાષાના અભ્યાસ સાથે અન્ય વિષયો પણ તમિલમાં ભણાવવામાં આવે છે. આ ઉપરાંત અહીં તેલુગુ અને પંજાબી સહિત અન્ય ભારતીય ભાષાઓ પર પણ ખૂબ ધ્યાન આપવામાં આવે છે.