Final Up to date:
DGCA અનુસાર, 3 થી 5 ડિસેમ્બર 2025 વચ્ચે ઇન્ડિગોની 2,507 ફ્લાઇટ્સ રદ કરવામાં આવી હતી અને 1,852 ફ્લાઇટ્સ મોડે રવાના થઈ હતી, જેના કારણે 3 લાખથી વધુ મુસાફરો પ્રભાવિત થયા હતા.
નવી દિલ્હી: છેલ્લા કેટલાક દિવસોમાં દેશના લાખો મુસાફરોને મુશ્કેલીમાં મૂકનાર દેશની સૌથી મોટી ઘરેલુ એરલાઇન ઇન્ડિગો સામે સરકારે અત્યાર સુધીની સૌથી કડક કાર્યવાહી કરી છે. દેશના એવિએશન રેગ્યુલેટર ડાયરેક્ટોરેટ જનરલ ઓફ સિવિલ એવિએશન (DGCA) એ ઇન્ડિગો પર કુલ 22.20 કરોડ રૂપિયાનો દંડ ફટકાર્યો છે અને સાથે 50 કરોડ રૂપિયાની બેંક ગેરંટી જમા કરાવવાનો આદેશ આપ્યો છે. આ કાર્યવાહી ડિસેમ્બર 2025માં મોટા પાયે ફ્લાઇટ રદ અને વિલંબના મામલાને લઈને કરવામાં આવી છે.
DGCA અનુસાર, 3 થી 5 ડિસેમ્બર 2025 વચ્ચે ઇન્ડિગોની 2,507 ફ્લાઇટ્સ રદ કરવામાં આવી હતી અને 1,852 ફ્લાઇટ્સ મોડે રવાના થઈ હતી, જેના કારણે 3 લાખથી વધુ મુસાફરો પ્રભાવિત થયા હતા. આ ગંભીર સ્થિતિને ધ્યાનમાં રાખીને નાગરિક ઉડ્ડયન મંત્રાલય (MoCA)ના નિર્દેશ પર DGCAએ ચાર સભ્યોની તપાસ સમિતિ રચી છે.
તપાસમાં ખુલ્યું કે ઇન્ડિગોએ પોતાના ઓપરેશનને જરૂર કરતાં વધુ ઓપ્ટિમાઇઝ કરી દીધું હતું. ક્રૂ અને વિમાનોના મહત્તમ ઉપયોગ પર વધારે ભાર મૂકવામાં આવ્યો હતો, જેના કારણે રોસ્ટર બફર લગભગ ખતમ થઈ ગયો હતો. ઉપરાંત, સુધારેલા ફ્લાઇટ ડ્યુટી ટાઈમ લિમિટેશન (FDTL) નિયમો પણ યોગ્ય રીતે લાગુ કરવામાં આવ્યા નહોતા. સોફ્ટવેર સિસ્ટમ, ક્રૂ મેનેજમેન્ટ અને ઓપરેશનલ કન્ટ્રોલમાં પણ ગંભીર ખામીઓ જોવા મળી હતી.
DGCAએ ઇન્ડિગોના CEO અને COOને ચેતવણી આપી છે. સાથે જ, ઓપરેશન કન્ટ્રોલ સેન્ટરને હાલની જવાબદારીઓમાંથી દૂર કરવાની અને ભવિષ્યમાં કોઈપણ જવાબદાર પદ પર નિમણૂક ન કરવાની સૂચના આપવામાં આવી છે. ઉપરાંત, અન્ય ઘણા વરિષ્ઠ અધિકારીઓને પણ ચેતવણી આપવામાં આવી છે.
દંડની વાત કરીએ તો, અલગ-અલગ નિયમોના ઉલ્લંઘન માટે 1.80 કરોડનો દંડ ફટકારવામાં આવ્યો છે. સાથે જ, 5 ડિસેમ્બર 2025થી 10 ફેબ્રુઆરી 2026 સુધી 68 દિવસ સુધી FDTL નિયમોના ઉલ્લંઘન માટે દરરોજ 30 લાખના હિસાબે કુલ 20.40 કરોડનો દંડ લાગુ કરવામાં આવ્યો છે, જેથી કુલ રકમ 22.20 કરોડ થઈ છે.
