અમદાવાદ: માણેકબાગમાં ડોક્ટરના ઘરે થયેલી કરોડોની ચોરીનો ભેદ ઉકેલાયો, 2 આરોપીઓની ધરપકડ બાદ થયા ચોંકાવનારા ખુલાસા

ક્રાઈમ બ્રાન્ચની અલગ અલગ ટીમો સતત 12 દિવસ સુધી 200થી વધારે સીસીટીવી ફૂટેજ તપાસ્યા બાદ આરોપીની મૂળ કડી સુધી પહોંચ્યા હતા અને આખરે ચાંદખેડાના રહેવાસી કમલેશ પરમાર તેમજ શાહપુરના રહેવાસી મેહુલ પરમાર નામના આરોપીની ધરપકડ કરી છે. ક્રાઈમ બ્રાન્ચે બંને આરોપીઓ પાસેથી ચોરીમાં ગયેલ તમામ મુદ્દામાલ પણ એટલે કે 45 લાખ રોકડા, 1 કરોડની કિંમતના 2248 ગ્રામના દાગીના, 500 ગ્રામ ચાંદી જપ્ત કરી છે…

કમલેશ નામનો આરોપી ઘરફોડ ચોરીનો માસ્ટર માઈન્ડ છે અને અગાઉ પણ 10 જેટલા બનાવને અંજામ આપી ચૂક્યો છે. જે અગાઉ શંકર ભુવન ખાતે રહેતો હતો. ત્યારથી બંને આરોપીઓ મિત્ર છે અને રિક્ષા ચલાવીને ગુજરાન ચલાવે છે. બનાવના દિવસે પણ બંને મળ્યા અને ચોરી કરવાનું નક્કી કર્યું હતું. જોકે કમલેશે અગાઉ આ જ સોસાયટીમાં ચોરી કરી હોવાથી સોસાયટીની ભૌગોલિક પરિસ્થિતિથી વાકેફ હતો એટલે ત્યાં ચોરી કરવાના ઇરાદે તબીબના બંગલામાં બારી તોડી પ્રવેશ કર્યો હતો.

ચોરી દરમિયાન કરોડો રૂપિયાના દાગીના અને રોકડ રૂપિયા મળતા બંને આરોપીઓ રિક્ષામાં ચાંદખેડા પહોંચ્યા હતા. જ્યાં પોલીસને ગેરમાર્ગે દોરવા માટે કમલેશે તેની બહેનના ઘર પાસે રિક્ષા પાર્ક કરી પોતાના ઘરે પહોંચ્યો હતો. જ્યાં બંનેએ રોકડ રકમ અડધા ભાગે વહેંચી લીધી હતી. જ્યારે દાગીના કમલેશે તેના પાસે રાખ્યા હતા. આ બાબતની જાણ પરિવારજનોને ના થાય તે માટે કમલેશ તેની પત્નીને પિયર મૂકી આવ્યો હતો.

ઉલ્લેખનીય છે કે આ ચોરીની ઘટનામાં અપેક્ષા કરતા વધુ મુદ્દામાલ મળી આવતા આરોપીઓ નિકાલ કેવી રીતે કરવો તેની ફિરાકમાં હતા. પરંતુ તેઓ વહીવટ કરે તે પહેલા જ ક્રાઈમ બ્રાન્ચે બંને આરોપીઓને ઝડપી લીધા છે. આરોપી કમલેશે આ રૂપિયામાંથી એક બલેનો કાર પણ ખરીદવાનું વિચાર્યું હતું. હાલમાં ક્રાઈમ બ્રાન્ચે બંને આરોપીઓની ધરપકડ કરીને સમગ્ર મામલે વધુ તપાસ શરૂ કરી છે.