અમદાવાદ: ડ્રગ્સની 79 કેપ્સ્યુલ ગળીને મહિલા ભારત આવી, એરપોર્ટ પર થયો પર્દાફાશ, કોર્ટે 20 વર્ષની સજા ફટકારી

મહિલાના સામાનની જ્યારે શરૂઆતમાં તપાસમાં કોઈ વાંધાજનક વસ્તુ મળી નહોતી, પરંતુ શારીરિક તપાસ દરમિયાન તેનું પેટ અસામાન્ય રીતે કઠણ જણાતા અધિકારીઓને શંકા ગઈ હતી. આ શંકાના આધારે વધુ તપાસ કરવામાં આવી હતી, જેમાં મહિલાએ 79 ડ્રગ્સની કેપ્સ્યુલ ગળીને લાવ્યાનું બહાર આવ્યું હતું.

મહિલાની સંમતિ બાદ તેને તાત્કાલિક સિવિલ હોસ્પિટલ ખાતે લઈ જવાઈ હતી. ત્યાં એક્સ-રે અને સીટી સ્કેન કરવામાં આવ્યા હતા, જેમાં તેના પેટમાં વિદેશી વસ્તુઓ હોવાની પુષ્ટિ થઈ હતી. તબીબોની સતત દેખરેખ હેઠળ ત્રણ દિવસ સુધી ચાલેલી પ્રક્રિયા બાદ તેના પેટમાંથી કુલ 79 ડ્રગ્સ કેપ્સ્યુલ સફળતાપૂર્વક બહાર કાઢવામાં આવી હતી.

આ કેપ્સ્યુલ્સને ગાંધીનગર સ્થિત FSLમાં મોકલવામાં આવ્યા હતા, જ્યાં પ્રાથમિક તપાસમાં તેમાં રહેલો પાવડર ‘હેરોઈન’ હોવાનું સાબિત થયું હતું. તમામ 79 કેપ્સ્યુલમાંથી કુલ 868 ગ્રામ હેરોઈન મળી આવ્યું હતું, જે NDPS કાયદા મુજબ ‘કોમર્શિયલ ક્વોન્ટિટી’ એટલે કે વ્યાપારી જથ્થામાં આવે છે. આ મામલે DRI દ્વારા મુકાકીબીબી હાના સામે NDPS એક્ટની વિવિધ કલમો હેઠળ ગુનો નોંધવામાં આવ્યો હતો અને ત્યારબાદ ચાર્જશીટ દાખલ કરવામાં આવી હતી.

કેસની સુનાવણી દરમિયાન ખાસ સરકારી વકીલ સુધીર ગુપ્તાએ પૂરતા સાક્ષી અને દસ્તાવેજી પુરાવા રજૂ કરી કોર્ટને જણાવ્યું હતું કે આવા અનેક કિસ્સાઓમાં વિદેશી નાગરિકો દ્વારા ભારતમાં ડ્રગ્સ ઘુસાડવામાં આવી રહી છે, જેના કારણે યુવા ધન નશાના રવાડે ચઢી બરબાદ થઈ રહ્યું છે. બંને પક્ષોની દલીલો બાદ સ્પેશિયલ NDPS કોર્ટે નોંધ્યું હતું કે કેસ ગંભીર છે અને આરોપ સંપૂર્ણ રીતે પુરવાર થાય છે. સમાજમાં કાયદાનો ભય રહે અને ડ્રગ્સ જેવી સામાજિક બુરાઈ સામે કડક સંદેશ જાય તે હેતુથી આરોપી મહિલાને 20 વર્ષની સખત કેદ અને દંડની સજા ફટકારી જેલમાં મોકલી આપવામાં આવી છે.