વર્ષાબેનના હાથમાં જાદુ! નાળિયેરના વેસ્ટમાંથી બનાવી મૂર્તિઓ, લોકો જોઈને દંગ રહી ગયા

ભાવનગર જિલ્લાના મહુવા શહેરમાં રહેતા બારૈયા વર્ષાબેન અલ્પેશભાઈ જેઓ અગાઉ ઘરકામ કરતા હતા, પરંતુ પાંચ વર્ષ પહેલાં તેઓએ નારિયેળના છાલામાંથી અલગ અલગ વસ્તુઓ તૈયાર કરવા માટેની ટ્રેનિંગ મેળવી ત્યારબાદ તેઓએ આ વ્યવસાય શરૂ કર્યો. આજે તેઓ અન્ય મહિલાઓને પણ આ પ્રકારની ટ્રેનિંગ આપી રહ્યા છે. હાલ તેઓ અલગ અલગ પ્રકારની મૂર્તિ, ગણપતિ બાપા, ઘર સુશોભનમાં વપરાતી વસ્તુઓ જેવી વસ્તુ તૈયાર કરી જુદા જુદા શહેરો સુધી પણ વેચાણ કરી રહ્યા છે. આ વસ્તુઓની કિંમત 150 રૂપિયાથી શરૂ થઈને અલગ અલગ ભાવ રહેલા છે. ઘરકામની સાથે સાથે મહિલા 10,000 રૂપિયા કરતા પણ વધુની આવક મેળવી રહ્યા છે.

આ અંગે બારૈયા વર્ષાબેન અલ્પેશભાઈએ જણાવ્યું હતું કે, અગાઉ હું ઘરકામ કરતી હતી, પરંતુ ધીરે ધીરે મને વિચાર આવ્યો કે આપણે પણ આત્મનિર્ભર બનવું જોઈએ જેથી મેં નારિયેળના રેસાનો ઉપયોગ કરીને અલગ અલગ પ્રકારની વસ્તુઓ તૈયાર કરવાની શરૂઆત કરી. આ માટે હું અલગ અલગ જગ્યાએ ટ્રેનિંગ પણ આપું છું. હાલ હવે 10 બહેનોનું જૂથ છે અને અલગ અલગ પ્રકારની કામગીરીઓ કરી રહ્યા છે, તેમાંથી મળતી આવકથી અમે પરિવારજનોને આર્થિક રીતે મદદરૂપ બની રહ્યા છીએ. પાંચ વર્ષ પહેલાં આ વ્યવસાયની શરૂઆત કરી હતી. શરૂઆતમાં એક થી બે જેટલી વસ્તુઓ તૈયાર કરતા હતા પરંતુ આજે અનેક પ્રકારની વસ્તુઓ તૈયાર કરી રહ્યા છીએ.