Video Viral: મારુતિ 800 બની ગઈ લમ્બોરગિની! આ ભાઈનો દેશી જુગાડ જોઈને આનંદ મહિન્દ્રા પણ થઈ જશે હેરાન

ઝારખંડના સરાયકેલા-ખરસાવાં જિલ્લાના ચાંડિલમાં રહેતા મોહમ્મદ આરિફ વ્યવસાયે કાર મિકેનિક છે. તેમના વિસ્તારમાં લોકો તેમને ‘ટાર્ઝન’ના નામથી ઓળખે છે. ઘણા વર્ષોથી ગાડીઓ પર કામ કરતાં-કરતાં તેમના મનમાં એક ખાસ કાર બનાવવાનું સપનું હતું. બાળપણમાં જોયેલી ફિલ્મ ‘ટાર્ઝન: ધ વન્ડર કાર’થી તેમને ઘણી પ્રેરણા મળી હતી, ત્યાર પછી તેમણે કંઈક અલગ કરવાનું નક્કી કર્યું. પોતાના આ જ સપનાને પૂરું કરવા માટે આરિફે એક જૂની મારુતિ 800 કાર લીધી અને તેને સંપૂર્ણપણે બદલવાનું કામ શરૂ કર્યું હતું. અંદાજે બે વર્ષની મહેનત પછી તેમણે આ કારને લમ્બોરગિની એવેન્ટાડોર (Lamborghini Aventador) જેવી દેખાતી સ્પોર્ટ્સ કાર બનાવી દીધી હતી. ખાસ વાત એ છે કે, આ આખું કામ તેમણે પોતાની નાની અમસ્તી વર્કશોપ ‘ટાર્ઝન ગેરેજ’માં જ કર્યું છે.

કહેવામાં આવી રહ્યું છે કે, આ કારને તૈયાર કરવામાં અંદાજે 4 લાખ રૂપિયાનો ખર્ચ થયો છે. કારની બોડી, ડિઝાઇન અને મોટાભાગના મોડિફિકેશન આરિફે પોતે જ કર્યા છે, જ્યારે કેટલીક વસ્તુઓ જેવી કે એલઈડી લાઈટ્સ અને મ્યુઝિક સિસ્ટમ બહારથી મંગાવવામાં આવી હતી. પહોળી બોડી, સ્પોર્ટી ડિઝાઇન અને મોટા એલોય વ્હીલ્સને કારણે આ કાર જોવામાં બિલકુલ સુપરકાર જેવી લાગે છે. આ અનોખી કારનો વીડિયો સોશિયલ મીડિયા પર ખૂબ વાયરલ થઈ રહ્યો છે. ઇન્સ્ટાગ્રામ પર miya_bhai99110 નામના એકાઉન્ટ પરથી શેર કરવામાં આવેલા આ વીડિયોને લાખો લોકો જોઈ ચૂક્યા છે. યુઝર્સ કમેન્ટ કરીને આરિફની મહેનત અને અનોખી કામગીરીનાં જોરદાર વખાણ કરી રહ્યા છે. જૂની મારુતિને લક્ઝરી સ્પોર્ટ્સ કારમાં ફેરવવાનો આ વીડિયો જોઈને લોકો આશ્ચર્યચકિત થઈ ગયા હતા. વીડિયોમાં જોઈ શકાય છે કે, કારનો લુક એટલો આકર્ષક છે કે પહેલી નજરે તેને ઓળખવી મુશ્કેલ છે કે આ સાચેમાં મારુતિ 800 છે કે કોઈ મોંઘીદાટ લક્ઝ્યુરસ કાર. ઘણા લોકો એવું પણ કહી રહ્યા છે કે, આ ભાઈનો દેશી જુગાડ જોઈને આનંદ મહિન્દ્રા પણ  હેરાન થઈ જશે.