Final Up to date:
ક્રિકેટના મેદાન પર અવારનવાર ભયંકર દુર્ઘટનાઓ સર્જાતી હોય છે, જેમાં ખેલાડી પોતાનો જીવ પણ ગુમાવી દે છે. તેથી જ ક્રિકેટની રમતમાં ખેલાડીઓ પોતાની સુરક્ષાનું વિશેષ ધ્યાન રાખે છે.
નવી દિલ્હી: ક્રિકેટના મેદાન પર અવારનવાર ભયંકર દુર્ઘટનાઓ સર્જાતી હોય છે, જેમાં ખેલાડી પોતાનો જીવ પણ ગુમાવી દે છે. તેથી જ ક્રિકેટની રમતમાં ખેલાડીઓ પોતાની સુરક્ષાનું વિશેષ ધ્યાન રાખે છે, પરંતુ તેમ છતાં ખેલાડી કોઈને કોઈ રીતે દુર્ઘટનાનો શિકાર બની જ જાય છે. આવું જ કંઈક વેસ્ટઇન્ડીઝ અને અફઘાનિસ્તાન વચ્ચે રમાઈ રહેલી ત્રણ ટી20 મેચની સીરિઝની છેલ્લી મેચમાં જોવા મળ્યું. જ્યારે અફઘાનિસ્તાનના રહમાનઉલ્લા ગુરબાજને માથા પર એક ખતરનાક થ્રો લાગ્યો.
ઘટના 15મી ઓવર દરમિયાન બની હતી, જ્યારે રહમાનુલ્લા ગુરબાજ વેસ્ટઇન્ડીઝના ફિલ્ડર દ્વારા થ્રો ફેંકાતા ઈજાગ્રસ્ત થયો. ગુરબાજના માથા પર સીધો બોલ વાગ્યો હતો. બોલ વાગતાં જ ગુરબાજનું હેલમેટ હવામાં ઉડી ગયું અને તે તરત જ જમીન પર પડી ગયો. મેદાનમાં હાજર અમ્પાયર તરત જ બંને હાથથી ગુરબાજનું માથું પકડીને તેની સ્થિતિ ચકાસવા લાગ્યા. ગુરબાજની આંખો ખુલ્લી હતી, પણ તેઓ સંપૂર્ણપણે બેભાન લાગતા હતા. જો ગુરબાજે હેલમેટ ન પહેર્યું હોત તો મેદાન પર મોટી દુર્ઘટના સર્જાઈ હોત.
વેસ્ટઇન્ડીઝના 152 રનના લક્ષ્યનો પીછો કરી રહેલી અફઘાનિસ્તાન ટીમે શમાર સ્પ્રિંગર દ્વારા કરાયેલા ઓવરના પહેલા બોલ પર સદિકુલ્લા અટલની વિકેટ ગુમાવી હતી. ત્યારબાદ દરવિશ રસૂલી બેટિંગ માટે મેદાનમાં આવ્યો. દરવિશ રસૂલીએ હળવા હાથથી મિડ ઑફ તરફ શોટ રમ્યો, જેમાં ગુરબાજ રન લેવા માટે દોડ્યા હતો, પણ દરવિશ રસૂલીએ તેમને રોકી દીધો. ગુરબાજ દોડવા લાગ્યો હતો, પણ સાથી બેટ્સમેનની મનાઈને કારણે તેને પાછા ફરવું પડ્યું.
આ દરમિયાન વેસ્ટઇન્ડીઝના ફિલ્ડરે ગુરબાજને રનઆઉટ કરવાનો પ્રયાસ કર્યો અને બોલ સીધો તેના માથા પર વાગી ગયો. જ્યારે ગુરબાજને ઈજા પહોંચી, ત્યારે તે 47 બોલમાં 53 રન બનાવી ચૂક્યો હતો. ગુરબાજને બોલ વાગ્યા બાદ થોડીવાર માટે મેચ રોકવી પડી, પણ ગુરબાજે હિંમત ન હારી અને ફરી બેટિંગ કરવા મેદાનમાં ઉતર્યો. ગુરબાજે આખરે 71 રન બનાવ્યા. તેમ છતાં, અફઘાનિસ્તાનની ટીમ આ મેચ 15 રને હારી ગઈ.
Jan 24, 2026 11:59 PM IST
