VIDEO: બ્રિટિશ સંસદમાં મહિલા સાથેની દલીલ દરમિયાન વડાપ્રધાન સ્ટાર્મરે કર્યો ‘કામસૂત્ર’નો ઉલ્લેખ

હકીકતમાં, વડાપ્રધાન કીર સ્ટાર્મર પોતાની સરકાર પર લાગેલા ‘યુ-ટર્ન’ના આરોપોનો જવાબ આપી રહ્યા હતા. તેમણે કન્ઝર્વેટિવ પાર્ટીના છેલ્લા 14 વર્ષના શાસનની સીધી તુલના ‘કામસૂત્ર’ સાથે કરી દીધી. તેઓ કન્ઝર્વેટિવ પાર્ટીની નેતા કેમી બેડેનોકને જવાબ આપી રહ્યા હતા.

આ મામલાની શરૂઆત પણ કેમી બેડેનોકે જ કરી હતી. કન્ઝર્વેટિવ નેતા કેમી બેડેનોકે બ્રિટનમાં કામ કરવા માટે ‘ડિજિટલ આઈડી કાર્ડ’ ફરજિયાત બનાવવાની યોજના સામે વિરોધ નોંધાવ્યો હતો અને સરકાર દ્વારા આ યોજના પાછી ખેંચવાના નિર્ણયની પણ મજાક ઉડાવી હતી. તેણે કહ્યું કે, ‘હેલ્થ સેક્રેટરીએ કાલે કહ્યું હતું કે વડાપ્રધાને નવા વર્ષમાં સંકલ્પ લીધો છે કે હવે કોઈ પણ કામ પહેલી જ વારમાં બરાબર રીતે કરવાનો પ્રયાસ કરશે.’ આ વાત સાંભળીને સભામાં હાજર બધા લોકો હસી પડ્યા હતા.

આ પછી સ્ટાર્મર ઊભા રહ્યા અને કન્ઝર્વેટિવ પાર્ટી પર સીધો પ્રહાર કર્યો. તેમણે કહ્યું કે, છેલ્લા 14 વર્ષમાં આ પાર્ટીએ પોતાની નીતિઓ અને નેતાઓ એટલી વાર બદલ્યા છે કે ‘કામસૂત્ર’ની પોઝિશન પણ ઓછી પડી જાય. સ્ટાર્મરે જોરદાર પ્રહાર કરતા કહ્યું, ‘14 વર્ષ, 5 વડાપ્રધાન, 6 ચાન્સલર અને 16 હાઉસિંગ મિનિસ્ટર… આ લોકોએ કામસૂત્ર કરતાં પણ વધુ પોઝિશન બદલી છે. એમાં કોઈ આશ્ચર્ય નથી કે હવે એ લોકો થાકી ગયા છે અને દેશને પણ બરબાદ કરી નાખ્યો છે.’ સ્ટાર્મરના આ નિવેદન પછી સંસદમાં હાસ્ય અને ગુસ્સાનો એવો માહોલ સર્જાયો કે થોડીવાર માટે કાર્યવાહી અટકાવી દેવી પડી.