Abhijit Dipke CJP Protest in Delhi: દિલ્હીના પ્રસિદ્ધ કનોટ પ્લેસ (CP) ખાતે તહેવારોના સમયે પ્રદર્શન કરવાને કારણે સ્થાનિક વેપારીઓના બિઝનેસ પર વિપરીત અસર થવાના આક્ષેપો થઈ રહ્યા છે. આ મામલો સુપ્રીમ કોર્ટ સુધી પહોંચ્યા બાદ હવે ‘કોકરોચ જનતા પાર્ટી’ (CJP) ના પ્રમુખ અભિજીત દીપકે આ વિવાદ પર પોતાની આકરી પ્રતિક્રિયા આપી છે. તેમણે દુકાનદારોને થતા નુકસાન માટે સરકાર દ્વારા લાદવામાં આવેલા પ્રતિબંધોને જવાબદાર ઠેરવ્યા છે અને ભારપૂર્વક જણાવ્યું છે કે તેમની પાર્ટી હંમેશા શાંતિપૂર્ણ વિરોધમાં જ માને છે.
“બિઝનેસને નુકસાન પ્રદર્શનથી નહીં, સરકારના બંધથી થાય છે”
અભિજીત દીપકે વેપારીઓની નારાજગી પર નિવેદન આપતા જણાવ્યું હતું કે, “શાંતિપૂર્ણ પ્રદર્શન કરવાથી બિઝનેસને કોઈ નુકસાન થતું નથી. ખરી નુકસાની ત્યારે થાય છે જ્યારે સરકાર આખા શહેરને બંધ કરી દેવાનો નિર્ણય લે છે, ઈન્ટરનેટ સેવાઓ ઠપ કરી દે છે અને નાગરિકોની અવરજવર પર રોક લગાવીને શહેરને યુદ્ધક્ષેત્રમાં ફેરવી દે છે.” CJP એ શુક્રવારે સાંજે કનોટ પ્લેસ ખાતે રાષ્ટ્રધ્વજ ફરકાવવાની જાહેરાત કરી છે.
ગાંધીજીના અહિંસાના માર્ગ અને બંધારણમાં વિશ્વાસ
પોતાના જૂના આંદોલનોનો ઉલ્લેખ કરતા દીપકે ઉમેર્યું હતું કે, “શરૂઆતથી જ અમારી પાર્ટીએ મહાત્મા ગાંધીના અહિંસા અને શાંતિના માર્ગ પર ચાલવાનો સંકલ્પ કર્યો છે. અમે મુંબઈ, પુણે, જયપુર, લખનઉ, બેંગલુરુ અને નાગપુર જેવા શહેરોમાં પણ આંદોલનો કર્યા છે અને તે તમામ શાંતિપૂર્ણ રહ્યા છે.”
જયપુરની ઘટના યાદ કરતા તેમણે કહ્યું, “જયપુરમાં મારી સાથે મારપીટ કરવામાં આવી હતી, છતાં મેં વળતો પ્રહાર કર્યો નહોતો. હિંસાનો જવાબ હિંસાથી આપવો એ અમારા સિદ્ધાંતોની વિરુદ્ધ છે. શારીરિક શક્તિ અજમાવવા કરતાં ડૉ. બી. આર. અંબેડકર દ્વારા તૈયાર કરાયેલા બંધારણીય અધિકારોનો ઉપયોગ કરવો વધુ યોગ્ય છે.”
વિપક્ષમાં હતા ત્યારે વિરોધ કરવાનો અધિકાર હતો અને હવે પાબંદીઓ?
સરકાર પર આકરા પ્રહારો કરતા CJP પ્રમુખે કહ્યું કે, અન્યાય સામે અવાજ ઉઠાવવો કે સત્તાધીશો પાસે જવાબ માગવો એ કોઈ અરાજકતા નથી, પરંતુ લોકશાહીની મૂળભૂત અભિવ્યક્તિ છે. તેમણે ઉમેર્યું, “આજે જે પક્ષ સત્તામાં છે, તેણે વિપક્ષમાં રહીને રસ્તા પર ઊતરીને વિરોધ પ્રદર્શનો કરવામાં દાયકાઓ વિતાવ્યા છે.
જો તે સમયે તેમના પર આટલા પ્રતિબંધો કે પોલીસ કાર્યવાહી થઈ હોત, તો આજે તેઓ સત્તા સુધી પહોંચી શક્યા ન હોત. વિપક્ષમાં હોવ ત્યારે વિરોધને લોકશાહી અધિકાર ગણાવવો અને સત્તામાં આવ્યા પછી તેને જાહેર વ્યવસ્થા માટે ખતરો માનવો એ બેવડું વલણ (પાખંડ) છે.”
સાંજે 5 વાગ્યે ધ્વજવંદનનો કાર્યક્રમ
દિલ્હી પોલીસે સીજેપીના નાના જૂથને ઝંડો ફરકાવવાની મંજૂરી આપી છે, જ્યારે સેન્ટ્રલ પાર્કને બે દિવસ માટે બંધ કરી દેવામાં આવ્યો છે. દીપકે સ્પષ્ટ કર્યું કે તેઓ કોઈ ખાસ વ્યવસ્થા કે વીઆઈપી ટ્રીટમેન્ટ નથી માગી રહ્યા, પરંતુ દેશના દરેક નાગરિકને મળેલા બંધારણીય અધિકારોનો ઉપયોગ કરી રહ્યા છે.
આ પણ વાંચોઃ- ટ્રેન અકસ્માતમાં મૃત્યુ થાય તો રેલવે કેટલું વીમા વળતર આપે છે? જાણો ટ્રેન ટ્રાવેલ ઇન્શ્યોરન્સના નિયમ અને રકમ
ઉલ્લેખનીય છે કે, હાલમાં જ જંતર મંતર પર તિરંગો ફરકાવવા અને નારેબાજી કરવા બદલ CJP ના બે નેતાઓ સૌરભ દાસ અને આશુતોષ રાંકાની પોલીસે અટકાયત કરી હતી. જંતર મંતરને પ્રદર્શન સ્થળોની યાદીમાંથી હટાવી દેવામાં આવતા પાર્ટીમાં ભારે રોષ જોવા મળી રહ્યો છે.
