જીવનશૈલી | રેસીપી | શ્રાવણ મહિનો શરૂ છે એમાં ઘણા લોકો ઉપવાસ કરે છે, કોઈપણ વ્રત કે ઉપવાસ દરમિયાન જો કંઈક ગળ્યું અને હેલ્ધી ખાવાનું મન થાય, તો આ ફરાળી સુખડી (Farali Sukhdi) એક ઉત્તમ વિકલ્પ છે. ઘઉંના લોટને બદલે ફરાળી લોટ (રાજગરા કે શિંગોડાનો લોટ), શુદ્ધ ઘી અને ગોળમાંથી બનતી આ સુખડી એકદમ સોફ્ટ, ટેસ્ટી અને ઈન્સ્ટન્ટ બની જાય છે.
ઉપવાસમાં શરીરમાં ઊર્જા જાળવી રાખવા માટે આ સુખડી ખૂબ જ ગુણકારી છે. માત્ર ૩ સામગ્રીમાંથી 10 જ મિનિટમાં તૈયાર થતી આ મોંમાં ઓગળી જાય તેવી ફરાળી સુખડી ઘરે બનાવો.
ફરાળી સુખડી રેસીપી
સામગ્રી
- 1 કપ ઘી
- 1 કપ ફરાળી લોટ
- 1/2 કપ ગોળ
ફરાળી સુખડી બનાવવાની રીત
સુખડી બનાવતા પહેલા એક થાળી કે ટ્રેને થોડા ઘી વડે ગ્રીસ કરીને બાજુ પર રાખી દો. એક ભારે તળિયાવાળી કડાઈમાં 1 કપ ઘી ગરમ કરો. ઘી ઓગળે એટલે તેમાં 1 કપ ફરાળી લોટ ઉમેરો.
ધીમા તાપે ચમચા વડે સતત હલાવતા રહીને લોટને શેકો. લોટનો કલર હલકો બદામી થાય અને તેમાંથી સરસ સુગંધ આવવા લાગે (લગભગ 5 મિનિટ) ત્યાં સુધી શેકવો.
લોટ બરાબર શેકાઈ જાય એટલે ગેસની ફ્લેમ એકદમ ધીમી કરો અથવા ગેસ બંધ કરી દો, હવે તેમાં 1/2 કપ ઝીણો સમારેલો ગોળ ઉમેરો.
ગોળને ગરમ લોટ અને ઘીના મિશ્રણમાં ઝડપથી મિક્સ કરી લો જેથી ગોળ ઓગળી જાય.
ગોળ ઓગળીને મિશ્રણ એકરસ થઈ જાય એટલે તરત જ તેને ગ્રીસ કરેલી થાળીમાં કાઢી લો. વાટકીના પાછળના ભાગે થોડું ઘી લગાવીને મિશ્રણને થાળીમાં એકસરખું પાથરીને સમતલ કરી લો.
મોરૈયાની ખીચડી નહિ, લાડુ ટ્રાય કરો, બધાના ફેવરિટ બની જશે!
સુખડી સહેજ ગરમ હોય ત્યારે જ ચપ્પુ વડે તેમાં ચોરસ કે કાજુ કતરી આકારના ટુકડા પાડી લો. પૂર્ણપણે ઠંડી થાય એટલે તેના ટુકડા અલગ કરી લો.
તૈયાર છે તમારી સોફ્ટ અને પૌષ્ટિક ફરાળી સુખડી! તેને એર-ટાઈટ કન્ટેનરમાં ભરીને ઉપવાસ દરમિયાન આરામથી ખાઈ શકો છો.
