અમેરિકા-ઈરાન યુદ્ધ સમાપ્ત થવાના આરે, અમેરિકી વિદેશ મંત્રી રુબિઓએ કહ્યું – ઓપરેશન એપિક ફ્યુરી ખતમ

Strait of Hormuz : અમેરિકા-ઈરાન યુદ્ધ જલ્દી સમાપ્ત થાય તેવા સંકેતો જોવા મળી રહ્યા છે. અમેરિકી વિદેશ મંત્રી માર્કો રુબિઓએ દાવો કર્યો હતો કે ઈરાન સાથેનું સૈન્ય ઓપરેશન (ઓપરેશન એપિક ફ્યુરી) સમાપ્ત થઈ ગયું છે અને તેના લક્ષ્યો પૂરા થઈ ગયા છે. તેમણે કહ્યું કે આ સંઘર્ષ મહિનાઓના નહીં પરંતુ થોડા અઠવાડિયાનો હતો અને યુએસ સીધા જમીન પર સૈનિકોને ઉતારશે નહીં.

ન્યૂઝ એજન્સી રોઇટર્સના એક અહેવાલમાં અમેરિકી ન્યૂઝ ચેનલ એક્સિસને ટાંકીને કહેવામાં આવ્યું છે કે વ્હાઇટ હાઉસને લાગે છે કે તે ઇરાન સાથે એક પાનાના સમજૂતી કરાર (એમઓયુ) પર સહમત થવાની નજીક આવી ગયું છે. આ કરારનો હેતુ ચાલુ યુદ્ધનો અંત લાવવાનો અને વધુ વ્યાપક પરમાણુ વાટાઘાટો માટે એક માળખું બનાવવાનો છે.

રિપોર્ટ અનુસાર અમેરિકાને આગામી 48 કલાકમાં ઈરાનનો જવાબ મળવાની આશા છે. જોકે હજી સુધી કોઈ અંતિમ કરાર થયો નથી, પરંતુ યુદ્ધ શરૂ થયા પછી પરિસ્થિતિ સૌથી નજીક હોવાનું માનવામાં આવે છે.

‘ઓપરેશન એપિક ફ્યુરી’ હવે સમાપ્ત

અમેરિકી વિદેશ મંત્રીએ કહ્યું કે ઈરાન વિરુદ્ધ 28 ફેબ્રુઆરીથી શરૂ થયેલું ‘ઓપરેશન એપિક ફ્યુરી’ હવે સમાપ્ત થઈ ગયું છે. વ્હાઇટ હાઉસમાં એક બ્રીફિંગ દરમિયાન તેમણે કહ્યું કે આ મિશને તેના ઉદ્દેશ્યો પ્રાપ્ત કર્યા છે. યુએસ અને ઇરાન એવા કરાર પર પહોંચવાનો પ્રયાસ કરી રહ્યા છે જે સંઘર્ષનો અંત લાવશે અને હોર્મુઝ સ્ટ્રેટ ફરીથી ખોલશે.

રોઇટર્સના જણાવ્યા અનુસાર રુબિઓએ એમ પણ કહ્યું હતું કે અમેરિકાએ ચીન અને રશિયા દ્વારા સંભવિત વીટોથી બચવા માટે સંયુક્ત રાષ્ટ્રના પ્રસ્તાવના ડ્રાફ્ટમાં કેટલાક ફેરફારો કર્યા છે. સુધારેલા ઠરાવમાં ઇરાનને તેના હુમલાઓ, સુરંગો નાખવા અને જળમાર્ગમાં ટોલ વસૂલાત કરવાનું બંધ કરવા અને માનવતાવાદી સહાયને પસાર થવા દેવા માટે કહેવામાં આવ્યું છે.

પીએમ મોદીએ કહ્યું – ગંગાથી ગંગાસાગર સુધી કમળ જ કમળ ખીલ્યા, આજથી બંગાળ ભયમુક્ત બન્યું છે

પ્રસ્તાવિત કરારના મુખ્ય મુદ્દાઓ આ પ્રમાણે  હોઈ શકે છે

• ઇરાન દ્વારા પરમાણુ સંવર્ધન પર અસ્થાયી મોકૂફી 
• યુએસ દ્વારા પ્રતિબંધો હટાવવા અને ઇરાનની અબજો ડોલરની ફ્રિઝ કરેલી સંપત્તિને મુક્ત કરવી 
• બંને પક્ષો દ્વારા હોર્મુઝ સ્ટ્રેટમાં અવરજવર પર લાગેલા પ્રતિબંધો હટાવવા

જોકે રોઇટર્સ સ્વતંત્ર રીતે આ અહેવાલની પુષ્ટિ કરી શક્યું નથી. યુએસ સ્ટેટ ડિપાર્ટમેન્ટ અને વ્હાઇટ હાઉસ તરફથી તાત્કાલિક કોઈ પ્રતિક્રિયા આપવામાં આવી નથી.

અમેરિકાએ ‘પ્રોજેક્ટ ફ્રીડમ’કાર્યવાહી રોકી

અમેરિકી રાષ્ટ્રપતિ ડોનાલ્ડ ટ્રમ્પે મંગળવારે એક મહત્વનો નિર્ણય લીધો હતો અને ‘પ્રોજેક્ટ ફ્રીડમ’ નામની નૌકાદળની કાર્યવાહીને થોડા સમય માટે રોકી દીધી હતી. ઇરાન સાથે ચાલી રહેલી વાતચીતમાં સારી પ્રગતિના સંકેતો મળ્યા પછી આ પગલું લેવામાં આવ્યું છે.