ઇરાન યુદ્ધ વચ્ચે મોજતબા ખામેનેઇનો પ્રથમ સંદેશો, હોર્મુઝ બંધ રાખવામાં આવશે, યુએસ બેઝ તાત્કાલિક દૂર કરવામાં આવે

Iran new Supreme Chief Mojtaba Khamenei : ઈરાનના નવા સુપ્રીમ લીડર અયાતુલ્લાહ મોજતબા ખામેનીઇએ પોતાના પ્રથમ સંદેશામાં હોર્મુઝ સ્ટ્રેટ બંધ રાખવાની વાત કરી છે. પદ સંભાળ્યા પછી ગુરુવારે સરકારી ટેલિવિઝન પર પ્રસારિત થયેલ આ તેમનો પહેલો જાહેર સંદેશો હતો. નવા નેતાનું આ નિવેદન એવા સમયે આવ્યું છે જ્યારે ઈરાન દ્વારા ફારસની ખાડીમાં શિપિંગ અને ઉર્જા માળખા પર સતત હુમલાઓને કારણે વૈશ્વિક તેલ બજાર ઉથલપાથલનો સામનો કરી રહ્યું છે. આંતરરાષ્ટ્રીય બજારમાં બ્રેન્ટ ક્રૂડ ઓઈલની કિંમત ફરી એકવાર પ્રતિ બેરલ 100 ડોલરથી ઉપર પહોંચી ગઈ છે.

દુશ્મનો પર દબાણ લાવવા માટે હોર્મુઝ બંધ રાખવામાં આવશે

રાષ્ટ્રને સંબોધનમાં ઈરાનના નવા સુપ્રીમ લીડર મોજતબા ખામેનેઇએ રાષ્ટ્રીય એકતા માટે અપીલ કરી હતી. તેમણે કહ્યું કે દુશ્મનો પર દબાણ લાવવા માટે હોર્મુઝ સ્ટ્રેટ બંધ રાખવામાં આવશે. તેમણે સ્પષ્ટપણે કહ્યું કે હોર્મુઝ સ્ટ્રેટ બંધ રહેશે, તેને ઈરાનના દુશ્મનો પર દબાણ લાવવાનું એક શક્તિશાળી માધ્યમ ગણાવ્યું. તેમણે પડોશીઓ સાથે મિત્રતા પર ભાર મૂક્યો પરંતુ અમેરિકાના સ્થળોને નિશાન બનાવવાનું ચાલુ રાખવાની વાત કહી હતી.

યુએસ બેઝ તાત્કાલિક બંધ કરવામાં આવે

ખામેનીઇએ પોતાના સંબોધન દરમિયાન આ ક્ષેત્રમાં તમામ યુએસ લશ્કરી બેઝ તાત્કાલિક બંધ કરવાની માંગ કરી હતી. તેમણે ચેતવણી આપી હતી કે જો આ બેઝ દૂર કરવામાં નહીં આવે તો તેના પર હુમલો કરવામાં આવશે. તેમણે સ્પષ્ટતા કરી હતી કે ઈરાન ફક્ત યુએસ બેઝને નિશાન બનાવી રહ્યું છે અને આ નીતિમાં કોઈ ફેરફાર થશે નહીં.

ઈરાનના નવા સુપ્રીમ લીડરનું આ નિવેદન એવા સમયે આવ્યું છે જ્યારે મધ્ય પૂર્વમાં તણાવ વધી રહ્યો છે અને તેલના ભાવ વધી રહ્યા છે. ઈરાનના કડક વલણથી આંતરરાષ્ટ્રીય સમુદાયમાં ચિંતા વધી છે.

આ પણ વાંચો – હોર્મુઝ સ્ટ્રેટના રસ્તે 1,35,335 મેટ્રિક ટન ક્રૂડ ઓઇલ લઈને જહાજ મુંબઈ પહોંચ્યું

યુદ્ધથી પ્રભાવિત 3.2 મિલિયન લોકો

શરણાર્થીઓ માટેના સંયુક્ત રાષ્ટ્રના ઉચ્ચ કમિશનરે ગુરુવારે અહેવાલ આપ્યો હતો કે ઈરાન પર યુએસ-ઇઝરાયલી હુમલાઓ શરૂ થયા પછી દેશમાં આશરે 3.2 મિલિયન ઈરાની નાગરિકો વિસ્થાપિત થયા છે. 

અમેરિકા, ઇઝરાયલ અને ઈરાન વચ્ચે યુદ્ધ શરૂ થયું ત્યારથી હોર્મુઝ સ્ટ્રેટમાં કાર્ગો માલવાહકોને નિશાન બનાવવામાં આવી રહ્યા છે. આ ચિંતાનો વિષય છે કારણ કે આ માર્ગ વિશ્વના તેલ અને LNG વેપારનો 20% હિસ્સો વહન કરે છે. યુદ્ધની શરૂઆતથી જ ઈરાન ચેતવણી આપી રહ્યું છે કે તે કોઈપણ જહાજોને હોર્મુઝ સ્ટ્રેટમાંથી પસાર થવા દેશે નહીં.