હવે 10 ડોલર પણ મોંઘુ થયું ક્રૂડ તો ભારત પર આવી પડશે આફત! કેટલા રૂપિયાનું નુકસાન થવાનો અંદાજ?

SMC ગ્લોબલ સિક્યોરિટીઝની નિષ્ણાત વંદના ભારતી કહે છે કે, પશ્ચિમ એશિયામાં વધતા તણાવને કારણે ક્રૂડ ઓઈલના ભાવ પર દબાણ જોવા મળી રહ્યું છે. જેના કારણે ભારતની ગ્રોથ, એનર્જી સપ્લાય અને મોંઘવારી પર પણ જોખમ ઊભું થઈ શકે છે. તેમણે કહ્યું કે, જો ક્રૂડના ભાવમાં 10 ડોલરનો પણ ઉછાળો આવે તો ભારતની GDP ગ્રોથ 0.5 ટકા સુધી ધીમી પડી શકે છે. કારણ કે, ભારત આજે પણ પોતાની 88 ટકા ક્રૂડ જરૂરિયાતો માટે આયાત પર આધાર રાખે છે અને પશ્ચિમ એશિયામાં વધતા તણાવથી આયાત પર ચોક્કસ અસર પડશે.

સપ્લાય ચેન પર પણ અસર- વંદના ભારતીએ જણાવ્યું કે, પશ્ચિમ એશિયા સહિત વૈશ્વિક બજારમાં વધતા તણાવને કારણે ક્રૂડ ઓઈલની સપ્લાય ચેન પર પણ અસર જોવા મળી રહી છે. હાલમાં ક્રૂડ ઓઈલના ભાવમાં 10થી 15 ડોલર પ્રતિ બેરલનો વધારો થઈ ચૂક્યો છે અને તેમણે કહ્યું એમ, 10 ડોલર પણ મોંઘું થયું તો GDP ગ્રોથ 0.5 ટકા ધીમી પડી જશે. કારણ કે, ઈરાન પાસે આવેલા Strait of Hormuzમાંથી દુનિયાના લગભગ 25 ટકા તેલની સપ્લાય થાય છે અને હાલના તણાવથી આ સપ્લાય પર અસર પડશે. એટલે કે, ભારતની અર્થવ્યવસ્થા પર ચોક્કસ અસર પડશે.

અસલ જોખમ બીજું છે

વંદના ભારતી કહે છે કે, માત્ર Strait of Hormuz બંધ થવો જ મુખ્ય સમસ્યા નથી, પણ આ તણાવને કારણે શિપમેન્ટને પોતાનો રૂટ બદલવો પડશે, જેના કારણે માલભાડામાં મોટો વધારો થઈ શકે છે અને ઈન્શ્યોરન્સ પ્રીમિયમ પણ વધી શકે છે. આ બધા ફેક્ટર્સ મળીને માત્ર ક્રૂડના ભાવ પર જ નહીં, પણ એનર્જી માર્કેટમાં પણ અનિશ્ચિતતા ઊભી કરશે. આ યુદ્ધમાં મોટાભાગના હુમલા એનર્જી સાઇટ્સ અને LNG પ્લાન્ટ્સ પર થઈ રહ્યા છે, જેના કારણે આવનારા સમયમાં ઊર્જા સંકટ વધી શકે છે.

ક્યાં સુધી જશે ક્રૂડનો ભાવ?

વંદના ભારતી કહે છે કે, ગયા એક અઠવાડિયામાં જ ક્રૂડ ઓઈલનો ભાવ 69 ડોલરથી વધીને 78 ડોલર પ્રતિ બેરલ સુધી પહોંચી ગયો છે. જો તણાવ આગળ વધશે તો ક્રૂડનો ભાવ 85થી 87 ડોલર પ્રતિ બેરલ સુધી જઈ શકે છે. કારણ કે, ભારતની નિર્ભરતા મોટાભાગે મિડલ ઈસ્ટના ક્રૂડ ઓઈલ પર છે, એટલે તેની અસર અંદાજ કરતાં પણ વધુ થઈ શકે છે. ઉદાહરણ તરીકે, ભારત માત્ર મિડલ ઈસ્ટમાંથી જ 50 ટકા તેલ ખરીદે છે. જો આ સમસ્યા બે અઠવાડિયા સુધી પણ ચાલે તો એશિયાઈ બજારો પર તેના ગંભીર પરિણામો પડી શકે છે.