સુરત: જાહેરમાં ચીલમમાં ગાંજો ભરીને યુવક નશો કરતો હતો, વીડિયો વાયરલ થતા જોવા જેવી થઈ

વીડિયો વાયરલ થતા મામલો પોલીસ સુધી પહોંચ્યો હતો. વાયરલ વીડિયોના આધારે પોલીસે તાત્કાલિક તપાસ શરૂ કરી અને વીડિયોમાં દેખાતા યુવકની ઓળખ અંકિત હીરપરા તરીકે કરી હતી. પોલીસે ઝડપી કાર્યવાહી કરીને અંકિતને ઝડપી પાડ્યો હતો. પોલીસ પૂછપરછ દરમિયાન અંકિત હીરપરાએ ગાંજાનું સેવન કર્યાની કબૂલાત કરી હતી. તેણે જણાવ્યું હતું કે ગાંજો તે રેલ્વે ટ્રેક નજીકથી લાવ્યો હતો અને બાદમાં સોસાયટીના વિસ્તારમાં ચિલમ બનાવી નશો કર્યો હતો.

યુવકે પોતાની ભૂલ સ્વીકારી અને માફી માંગી હતી. તેણે ભવિષ્યમાં આવું કૃત્ય ફરી નહીં કરવાની બાહેંધરી પણ આપી હતી. પોલીસે અંકિત વિરુદ્ધ નશીલા પદાર્થ સંબંધિત કાયદા હેઠળ ગુનો નોંધ્યો છે અને કાયદેસરની કાર્યવાહી હાથ ધરી છે. પોલીસે જણાવ્યું હતું કે જાહેરમાં નશીલા પદાર્થોનું સેવન કરવું ગંભીર ગુનો છે અને આવા કિસ્સાઓમાં કડક કાર્યવાહી કરવામાં આવશે.

જોકે આ ઘટનાએ સોસાયટી વિસ્તારમાં રહેતા લોકોમાં ચિંતા ફેલાવી છે. સ્થાનિક રહેવાસીઓએ જણાવ્યું હતું કે જાહેરમાં આવી હરકતો થવી સમાજ માટે ચિંતાજનક છે. પોલીસ દ્વારા ઝડપી કાર્યવાહી થતા લોકોમાં વિશ્વાસ વધ્યો છે. સરથાણા પોલીસે નાગરિકોને અપીલ કરી છે કે આવી કોઈ પણ ગેરકાયદેસર પ્રવૃત્તિ નજરે ચડે તો તાત્કાલિક પોલીસને જાણ કરવી. શહેરમાં કાયદો અને વ્યવસ્થા જાળવવા માટે પોલીસ સતત સતર્ક હોવાનું પણ જણાવાયું છે.