સીએમ યોગીનું અપમાન સહન કરીશ નહીં: અયોધ્યામાં તૈનાત ડેપ્યુટી કમિશ્નરે પદ પરથી રાજીનામું આપી દીધું

જો કે, શંકરાચાર્ય અને યોગી આદિત્યનાથ વચ્ચે વિવાદને લઈને આ પહેલું રાજીનામું નથી, આ અગાઉ બરેલીના જિલ્લા મજિસ્ટ્રેટ અલંકાર અગ્નિહોત્રીએ પણ UGC નિયમો અને યોગી દ્વારા શંકરાચાર્યના અપમાનનો વિરોધ કરતા સોમવારે, 26 જાન્યુઆરીના રોજ રાજીનામું આપી દીધું હતું. બાદમાં તેમને સસ્પેન્ડ કરી દીધા હતા.

આ ક્રમમાં હવે પ્રશાંત કુમાર સિંહનું નામ પણ જોડાઈ ગયું છે, પણ તેમનો પક્ષ બીજો છે. પ્રશાંતનું કહેવું છે કે પ્રધાનમંત્રી નરેન્દ્ર મોદી અને મુખ્યમંત્રી યોગી આદિત્યનાથના સમર્થનમાં તેમણે આ નિર્ણય લીધો છે. રાજ્યપાલ આનંદીબેન પટેલને મોકલેલા બે પાનાના પોતાના રાજીનામામાં પ્રશાંત લખે છે કે, મુખ્યમંત્રી યોગી આદિત્યનાથ લોકતાંત્રિક રીતે ચૂંટાયેલા રાજ્યના મુખ્યમંત્રી છે અને તેમનું અપમાન કોઈ પણ સ્થિતિમાં સ્વીકારી શકાય નહીં. જે રાજ્યનું હું નમક ખાઉં છું, જ્યાંથી મને વેતન મળે છે, હું એ રાજ્ય અને તેમના નેતૃત્વનો પક્ષધર છું.

પત્રમાં ડેપ્યુટી કમિશ્નરે આગળ જણાવ્યું કે શંકરાચાર્ય અવિમુક્તેશ્વરાનંદની ટિપ્પણીથી તેઓ છેલ્લા ત્રણ દિવસથી માનસિક રીતે આઘાત અનુભવી રહ્યા હતા, જેના કારણે તેમને આ કઠોર નિર્ણય લેવો પડ્યો છે. પ્રશાંતે સ્પષ્ટ કર્યું છે કે આ રાજીનામું તેમણે કોઈના દબાણમાં નહીં પણ આત્મસન્માન અને પોતાના વિચારોના આધાર પર આપ્યું છે.

પ્રશાંત કુમાર સિંહની અયોધ્યામાં પોસ્ટિંગ વર્ષ 2023માં થઈ હતી. તેઓ રાજ્યકર વિભાગના ડેપ્યુટી કમિશનરના પદ પર તૈનાત હતા. તેમનો એક વીડિયો પણ વાયરલ છે. જેમાં તેઓ પોતાની પત્ની સાથે ફોન પર વાત કરતા રડતા દેખાઈ રહ્યા છે.