રામલીલાના મંચ પર ‘અસલી યુદ્ધ’, ‘રાવણ’ની આંખમાં ‘રામે’ મારી દીધું તીર; પોલીસ સ્ટેશન સુધી પહોંચ્યો મામલો

સોનભદ્રમાં રામલીલા મંચન દરમિયાન રામનું પાત્ર ભજવતા કલાકારે તીર છોડ્યું, જે સીધું રાવણનું પાત્ર ભજવતા સુનીલ કુમારની આંખમાં વાગ્યું. આના કારણે સુનીલની આંખની રોશની જતી રહી છે. પોલીસે આ મામલે SC/ST એક્ટ સહિત હત્યાનો પ્રયાસ જેવી ગંભીર કલમો હેઠળ કેસ નોંધ્યો છે. રામલીલા કમિટીના મેનેજર વિરુદ્ધ પણ કેસ દાખલ કરાયો છે.

આ ઘટના 13 નવેમ્બર 2025ની મોડી રાત્રે લગભગ 12:30 વાગ્યે બની હતી. સોનભદ્રના શાહગંજ પોલીસ સ્ટેશન વિસ્તારમાં આવેલા ખૈરા ગામમાં રામલીલા ચાલી રહી હતી. રામ-રાવણ યુદ્ધના દ્રશ્યમાં ભગવાન રામનું પાત્ર નૈતિક પાંડેય ભજવી રહ્યા હતા. તેમણે સ્ક્રિપ્ટ અનુસાર તીર છોડ્યું, પરંતુ બેદરકારીથી તીર સીધું સુનીલની આંખ પર વાગ્યું. તીર વાગતા જ સુનીલ ચીસે-ચીસો પાડવા લાગ્યો અને મંચ પર જ ઢળી પડ્યો. ત્યાં હાજર દર્શકોમાં અફરાતફરી મચી ગઈ.

રામલીલા કમિટીના સભ્યોએ તરત જ સુનીલને ઉઠાવ્યો અને પ્રાથમિક સારવાર આપી, પરંતુ તેની હાલત ગંભીર હોવાથી તેને વારાણસીની એક હોસ્પિટલમાં દાખલ કરાયો હતો. ડોક્ટરોના જણાવ્યા મુજબ, સુનીલની ડાબી આંખની રોશની જતી રહી છે અને બીજી આંખ પણ અસરગ્રસ્ત થઈ શકે છે. હાલમાં તેની સારવાર ચાલુ છે.

સુનીલ કુમાર SC/ST સમુદાયનો છે. તેથી તેના પરિવારે પોલીસમાં ફરિયાદ નોંધાવી છે. પોલીસે તરત જ તપાસ શરૂ કરી છે. શાહગંજ પોલીસ સ્ટેશનના અધિકારીના જણાવ્યા મુજબ, રામનું પાત્ર ભજવતા નૈતિક પાંડેય વિરુદ્ધ SC/ST એક્ટની કલમ 3(1)(r) હેઠળ કેસ નોંધાયો છે, જે જાણીજોઈને અપમાન અથવા ઈજા પહોંચાડવા સાથે જોડાયેલી છે. તેમજ, હત્યાના પ્રયાસ અને બેદરકારીથી ગંભીર ઈજાની કલમો પણ ઉમેરવામાં આવી છે.

સુનીલ કુમારે ન્યૂઝ18 ઇન્ડિયા સાથેની વાતચીતમાં કહ્યું કે, રામલીલા દરમિયાન તેણે આંખની રોશની ગુમાવી છે. તે 10 વર્ષથી રાવણનું પાત્ર ભજવી રહ્યો છે. રાત્રે લગભગ 12 વાગ્યે રામ-રાવણ યુદ્ધ દરમિયાન આ બનાવ બન્યો. સુનીલના જણાવ્યા મુજબ, રામનું પાત્ર ભજવતા નૈતિક પાંડેએ વારંવાર મનાઈ કરવા છતાં તેની આંખ પર તીર માર્યું. અમારી વચ્ચે કોઈ દુશ્મની નહોતી, પરંતુ તેમણે આવું કેમ કર્યું તે સમજાતું નથી. મેં મારા પોતાના ખર્ચે વારાણસીમાં સારવાર કરાવી છે. મારી સારવાર હજુ ચાલુ છે.