રાજકોટ: લાલપરી તળાવ બનશે આદર્શ પિકનિક સ્પોટ, 18 કરોડના ખર્ચે રિડેવલપમેન્ટ થશે

આ રિડેવલપમેન્ટ પ્રોજેક્ટ હેઠળ તળાવનો સમગ્ર વિસ્તાર નવું સ્વરૂપ ધારણ કરશે. અંદાજે 18 કરોડથી વધુના ખર્ચે થનારા વિકાસ કામોમાં તળાવની આજુબાજુ 1 કિલોમીટર લાંબો લેકફ્રન્ટ તૈયાર કરવામાં આવશે. આ લેકફ્રન્ટ લોકો માટે ફરવા, બેસવા અને કુદરતી સૌંદર્ય માણવા માટે એક ખાસ આકર્ષણ બનશે. સવાર અને સાંજના સમયે પરિવાર, વડીલો અને યુવાનો માટે આ સ્થળ આરામ અને તાજગીનું કેન્દ્ર બનશે.

નાગરિકોના સ્વાસ્થ્યને વિશેષ મહત્વ આપતા આ પ્રોજેક્ટમાં 1650 મીટરનો વોકિંગ ટ્રેક બનાવવાની યોજના છે. સાથે સાથે 850 મીટરની ફૂટપાથ સુવિધા પણ ઊભી કરવામાં આવશે, જેથી પગપાળા ફરનાર લોકોને સલામત અને સુવ્યવસ્થિત માર્ગ મળે. નિયમિત ચાલવા આવનાર લોકો માટે આ તળાવ આરોગ્યપ્રદ આદતો વિકસાવવા માટે ઉત્તમ સ્થળ સાબિત થશે. લાલપરી તળાવના વિકાસમાં હરિયાળું વાતાવરણ પણ મુખ્ય ભૂમિકા ભજવશે. કુલ વિકાસ વિસ્તારમાંથી વિશાળ ભાગમાં ગાર્ડન તૈયાર કરવામાં આવશે, જ્યાં વૃક્ષો, લીલીછમ ઘાસ અને ખુલ્લી જગ્યાઓ શહેરને શ્વાસ આપશે.

આ હરિયાળો વિસ્તાર માત્ર સૌંદર્ય વધારશે નહીં, પરંતુ પ્રદૂષણ ઘટાડવામાં અને તાપમાન સંતુલનમાં પણ મદદરૂપ થશે. તળાવના કિનારે સુરક્ષાની દ્રષ્ટિએ ગેબિયન વોલ બનાવવામાં આવશે, જેથી વરસાદી પાણીના કારણે થતી માટીની ધોવાણ અટકાવી શકાય. આ સાથે તળાવની આસપાસની માળખાકીય સુરક્ષા મજબૂત બનશે અને લાંબા ગાળે તળાવનું સંરક્ષણ શક્ય બનશે. ટેન્ડર પ્રક્રિયા દરમિયાન સ્પર્ધાત્મક દરે કામ મળતા મનપાને નાણાકીય બચત પણ થવાની છે, જે શહેરના અન્ય વિકાસ કામોમાં ઉપયોગી બની શકે છે.