દીપિકા-જાન્હવી જેવા મોટા સ્ટાર્સ ઓરી સાથે ફોટો પડાવવાના આપે છે લાખો રૂપિયા! કરોડોની કમાણી અને ‘મેજિકલ ટચ’ વિશે કર્યો ખુલાસો!

નેટફ્લિક્સના શો ‘ધ ગ્રેટ ઇન્ડિયન કપિલ શો’માં આ વખતે મલાઈકા અરોરા, રવિ કિશન અને સોશિયલ મીડિયા સેન્સેશન ઓરી પહોંચ્યા હતા. ઓરીએ સ્ટેજ પર ખૂબ મસ્તી કરી અને રવિ કિશનના કહેવા પર ભોજપુરી પણ બોલ્યો હતો. આ દરમિયાન ઓરીએ પોતાનું સિક્રેટ શેર કરતાં જણાવ્યું કે, તે દરેક ફોટોના 15 લાખ રૂપિયા ચાર્જ કરે છે અને આ કિંમત ડિસ્કાઉન્ટ આપ્યા પછીની છે.

ઓરી બોલિવૂડની દરેક પાર્ટી અને ફંક્શનમાં જોવા મળે છે. ઘણી વાર સોશિયલ મીડિયા પર યુઝર્સ સવાલ પણ કરે છે કે, ઓરી દરેક જગ્યાએ કેવી રીતે પહોંચી જાય છે. હકીકતમાં ઓરીને બોલિવૂડના દરેક લગ્ન અને પાર્ટીનું ઇન્વિટેશન મળે છે અને તે લગ્નમાં જવા માટે પણ પૈસા ચાર્જ કરે છે. એટલું જ નહીં, ઓરી દરેક લગ્ન અને ફંક્શનમાં નવા આઉટફિટ પહેરે છે અને ક્યારેય કોઈ કપડાં રિપીટ કરતો નથી. ઓરીએ પોતે શોમાં આ ખુલાસા કર્યા છે.

‘ધ ગ્રેટ ઇન્ડિયન કપિલ શો’માં ઓરીએ જણાવ્યું હતું કે, વર્ષ 2025માં તેને 80-90 લગ્નોના ઇન્વિટેશન આવ્યા હતા અને તે લગભગ દરેક લગ્નનો હિસ્સો બન્યો હતો કારણ કે તે જ તેનું કામ છે. ઓરીએ એ પણ જણાવ્યું હતું કે, તે ખભા પર હાથ રાખવાવાળી ‘પોઝ’ સાથે ફોટો લેવાના પણ પૈસા ચાર્જ કરે છે. તેણે કહ્યું કે, ડિસ્કાઉન્ટ સાથે એક ફોટોના 15 લાખ રૂપિયા છે. ઓરીએ એ પણ ઉલ્લેખ કર્યો કે, લોકો એવું માને છે કે, તેનો સ્પર્શ મેજિકલ છે. તેણે જણાવ્યું હતું કે, લોકો તેની પાસે આવીને તેને અડકવા માટે કહે છે કારણ કે તેમનું માનવું છે કે, ઓરીના હાથ લગાડવાથી તેમની મુશ્કેલીઓ અને બીમારીઓ પણ મટી જાય છે. ઓરીએ એ પણ સ્પષ્ટ કર્યું કે, આ દાવો લોકો કરે છે, તે નહીં. તમને જણાવી દઈએ કે, આ પહેલા ઓરીએ ખુલાસો કર્યો હતો કે, 8 વર્ષથી એક કપલને સંતાન નહોતું થઈ રહ્યું, પરંતુ જેવો ઓરીએ તેના પતિને સ્પર્શ કર્યો, કપલને ત્યાં બાળકનો જન્મ થયો હતો. આ માટે પણ ઓરીએ તગડી રકમ ચાર્જ કરી હતી.