જનેતા બની હત્યારી: પતિ સાથે ઝઘડો થયો અને ભોગ 14 મહિનાની બાળકીનો લેવાયો, ઓશિકાથી દબાવીને મારી નાખી

હૈદરાબાદનું આ રિસાલા બજાર ગોલકુંડા પોલીસ સ્ટેશન વિસ્તારમાં આવે છે. મળતી માહિતી મુજબ, ઘરમાં રમઝાનના તહેવાર માટે કપડાં ખરીદવા બાબતે પતિ-પત્ની વચ્ચે બોલાચાલી થઈ હતી. સામાન્ય બોલાચાલી ધીમે ધીમે ગંભીર ઝઘડામાં ફેરવાઈ ગઈ હતી. આ ઝઘડાની વચ્ચે જે બન્યું એ સાંભળીને આખો વિસ્તાર ચોંકી ગયો હતો.

પોલીસ રિપોર્ટ અનુસાર, આરોપી મહિલાનું નામ ગૌસિયા બેગમ છે. પતિ સાથે થયેલા ઝઘડા પછી તે ખૂબ ગુસ્સામાં આવી ગઈ હતી. ગુસ્સામાં આવીને ગૌસિયા બેગમે પોતાની 14 મહિનાની દીકરીનું મોઢું ઓશિકા વડે દબાવી દીધું હતું. થોડી જ વારમાં બાળકીનો શ્વાસ રૂંધાઈ ગયો અને તે બેભાન થઈ ગઈ હતી. પરિવારજનોને ખબર પડી ત્યાં સુધીમાં ઘણું મોડું થઈ ગયું હતું.

બાળકીને બચાવવા માટે ઘણા પ્રયાસો કર્યા, પણ તેને બચાવી ન શકાઈ. આ ઘટનાથી પરિવારજનો અને આખા વિસ્તારમાં શોક છવાઈ ગયો હતો. પડોશીઓ અને સ્થાનિક લોકો પણ આ ઘટનાથી હેરાન હતા. કોઈને વિશ્વાસ નથી થતો કે એક માતા પોતાના જ બાળક સાથે આવું કેવી રીતે કરી શકે. સમગ્ર વિસ્તારમાં આ ઘટના ચર્ચાનો વિષય બની ગઈ છે.

ઘટનાની જાણ થતાં જ ગોલકુંડા પોલીસ ઘટનાસ્થળે પહોંચી ગઈ હતી અને પ્રાથમિક તપાસ શરૂ કરી હતી. અધિકારીઓએ જણાવ્યું કે, સમગ્ર ઘટનાક્રમની વિગતવાર તપાસ કરવામાં આવી રહી છે. પોલીસ એ પણ જાણવાની કોશિશ રહી છે કે ઝઘડાનું સાચું કારણ શું હતું અને ઘટનાના સમયે ઘરમાં કોણ-કોણ હાજર હતું. હાલ આ મામલે દરેક દિશામાં તપાસ ચાલી રહી છે.

પોલીસના જણાવ્યા અનુસાર, પ્રાથમિક તપાસમાં સામે આવ્યું છે કે, રમઝાન માટે કપડાં ખરીદવા બાબતે પતિ-પત્ની વચ્ચે ઝઘડો થયો હતો. આ ઝઘડાની અસરથી ગુસ્સામાં આવીને મહિલાએ આ પગલું ભર્યું હતું. જોકે, પોલીસનું કહેવું છે કે આખી તપાસ પછી જ સાચી હકીકત સામે આવશે. હાલ આ દુઃખદ ઘટનાને લઈ અનેક સવાલો ઊઠી રહ્યા છે.