ગુજરાતના ભૂસ્તરશાસ્ત્રીય ઈતિહાસ પર મોટું સંશોધન: 1900 વર્ષ પહેલાં વડનગરમાં આવેલા ભૂકંપના પુરાવા મળ્યા!

આજે ગૃહમાં લિંબાયત વિધાનસભાના ધારાસભ્ય સંગીતા પાટીલે ભૂ-રાસાયણિક સંશોધન અંગે પ્રશ્ન પૂછતા, વિજ્ઞાન અને ટેકનોલોજી વિભાગના મંત્રીએ વિધિવત જાણકારી આપી. તેમણે જણાવ્યું કે વડનગર અને ખંભાતમાં કરાયેલા સંશોધનોમાં મહત્વની સફળતા પ્રાપ્ત થઈ છે, જેમાં ISR દ્વારા છેલ્લા બે વર્ષમાં હાથ ધરાયેલા અભ્યાસોમાં ભૂકંપ અને હવામાન પરિવર્તનના ચોંકાવનારા ખુલાસા થયા છે.

ISR દ્વારા કરાયેલા સંશોધનમાં વડનગરમાં આશરે 1900 વર્ષ પૂર્વે આવેલા ભૂકંપની વૈજ્ઞાનિક ઓળખ કરવામાં આવી છે. ખંભાત વિસ્તારમાં છેલ્લા 10,000 વર્ષ દરમિયાન દરિયાઈ સપાટીમાં થયેલા ફેરફારો અંગે વિશ્લેષણાત્મક અભ્યાસ કરવામાં આવ્યો છે. આ ઉપરાંત, કચ્છના વિસ્તારને પ્રાકૃતિક પ્રયોગશાળા તરીકે ઓળખવામાં આવ્યો છે, જ્યાં હવામાન પરિવર્તન અંગે ગહન સંશોધન થયો છે.

આ સંશોધનોના મદદથી ગુજરાત રાજ્યના માઈનર ખનિજોના સ્ત્રોતોનું વૈજ્ઞાનિક મૂલ્યાંકન કરવામાં આવ્યું છે. આ માહિતી આપત્તિ વ્યવસ્થાપન અને હવામાનની આગાહી માટે ખૂબ ઉપયોગી સાબિત થઈ છે. રાજ્ય સરકારના વિજ્ઞાન અને ટેકનોલોજી મંત્રીએ આ સંશોધનોની વિગતવાર રજૂઆત કરીને તેમને મહત્વપૂર્ણ ગણાવ્યા છે.