Nail Artwork: બ્રશ નહીં, નખથી બને છે ચિત્ર, કમલભાઈ ભટ્ટની દુર્લભ કળાની અદભૂત દુનિયા

કમલભાઈ ભટ્ટ કહે છે કે તેઓ નેઈલ પેઈન્ટિંગ કરે છે અને આ કળા માત્ર શોખ નહીં પરંતુ તેમની ઓળખ બની ગઈ છે. તેઓ શાળા અને કોલેજોમાં જઈને વિદ્યાર્થીઓને નેઈલ આર્ટ શીખવાડે છે. આજની યુવા પેઢી નવી-નવી કળાઓ શીખવામાં રસ લે છે ત્યારે કમલભાઈ તેમને પરંપરાગત અને અનોખી કળા સાથે જોડવાનો પ્રયાસ કરે છે. તેમના મતે, નખ ચિત્ર કળા એક એવી કળા છે જેમાં ધીરજ, એકાગ્રતા અને કલ્પનાશક્તિ સૌથી વધુ જરૂરી છે.

કમલભાઈ નેઈલ આર્ટમાં વિવિધ પ્રકારની રચનાઓ બનાવે છે. તેઓ નખ દ્વારા ગણેશજી, રાધા-કૃષ્ણ જેવા ધાર્મિક ચિત્રો બનાવે છે, તો બીજી તરફ મોડર્ન આર્ટ, ફ્લાવર આર્ટ અને નેચરલ સીન જેવી આધુનિક અને પ્રાકૃતિક થીમ પણ રજૂ કરે છે. નખ જેટલી નાની સપાટી પર આટલી બારીક અને જીવંત રચના ઉભી કરવી સહેલી બાબત નથી, પરંતુ કમલભાઈની વર્ષોની મહેનત અને અનુભવના કારણે આ શક્ય બન્યું છે. આર્ટ સાથે સાથે કમલભાઈ બર્થડે કે લગ્ન જેવા પ્રસંગોમાં ભેટ આપવા માટે ખાસ પ્રકારના કાર્ડ્સ પણ બનાવી આપે છે. આ કાર્ડ્સ સંપૂર્ણ રીતે હેન્ડમેઈડ હોય છે અને તેમાં પણ તેમની કલાત્મકતા સ્પષ્ટ દેખાય છે. તેઓ માને છે કે ભેટમાં આપેલી વસ્તુમાં લાગણી જોડાયેલી હોવી જોઈએ અને હાથે બનાવેલી વસ્તુ એ લાગણીને વધુ મજબૂત બનાવે છે.

નેઈલ આર્ટ કમલભાઈએ તેમના પિતા પાસેથી શીખી છે. તેમના પિતા પણ આ કળા સાથે જોડાયેલા હતા અને બાળપણથી જ કમલભાઈએ આ કળાને નજીકથી જોઈ અને શીખી. છેલ્લા 20 વર્ષથી કમલભાઈ આ આર્ટ સાથે સંકળાયેલા છે અને આજે તેઓ આ ક્ષેત્રમાં એક ઓળખાયેલું નામ છે. સરકાર તરફથી પણ તેમને સારું એવું પ્રોત્સાહન મળ્યું છે, જેનાથી તેઓ વધુ ઉત્સાહ સાથે પોતાની કળાને આગળ વધારી રહ્યા છે. કમલભાઈ નેઈલ આર્ટ ક્ષેત્રમાં ગોલ્ડ મેડાલિસ્ટ છે. બ્રહ્મ સમાજ દ્વારા તેમને બ્રહ્મ એવોર્ડથી સન્માનિત કરવામાં આવ્યા છે. રાજસ્થાન સરકાર દ્વારા પણ તેમને ગોલ્ડ મેડલ આપવામાં આવ્યો હતો. આ તમામ સન્માનો તેમના માટે માત્ર પુરસ્કાર નહીં પરંતુ તેમની મહેનત અને પ્રતિબદ્ધતાની ઓળખ છે.