IND vs PAK T20 WC Controversy: આખરે ICC સામે નમવું પડ્યું, જાણો કેમ પાકિસ્તાનની શાન ઠેકાણે આવી

પાકિસ્તાને બાંગ્લાદેશ સાથે એકતા દર્શાવવા માટે મેચનો બહિષ્કાર કરવાનો નિર્ણય લીધો છે. બીજી તરફ, સુરક્ષા કારણોસર બાંગ્લાદેશે ભારતમાં રમવાનો ઇનકાર કર્યો હતો, જેના કારણે તેને વર્લ્ડ કપમાંથી બહાર કરી દેવામાં આવ્યું છે અને સ્કોટલેન્ડને સામેલ કરવામાં આવ્યું છે. આ સમગ્ર વિવાદના કારણે જો પીસીબી પોતાની જિદ પર અડગ રહેશે તો તેને ભારે આર્થિક નુકસાન સહન કરવું પડશે. બીજી બાજુ, આઈસીસી તરફથી બાંગ્લાદેશ પર હજુ કાર્યવાહી બાકી છે. આવી સ્થિતિમાં, બાંગ્લાદેશ હવે સમજદારી દાખવીને પાકિસ્તાનને ભારત સામે રમવા માટે મનાવી રહ્યું છે, જેથી તેને આઈસીસી તરફથી કડક સજા ન મળે.

લાહોરમાં મોહસિન નકવી સાથે મુલાકાત પછી અમીનુલ ઇસ્લામે કહ્યું, “આ સમયે બાંગ્લાદેશ સાથે ઊભા રહેવાના પાકિસ્તાનના પ્રયાસોથી અમે ખૂબ પ્રભાવિત છીએ. આ ભાઈચારો યથાવત્ રહે. પાકિસ્તાનની ગઈકાલની ટૂંકી મુલાકાત અને અમારી ચર્ચા પછી હું પાકિસ્તાનને વિનંતી કરીશ કે સમગ્ર ક્રિકેટ ઇકોસિસ્ટમના હિત માટે તે 15 ફેબ્રુઆરીએ ભારત સામે ટી20 વર્લ્ડ કપની મેચ રમે.”

જોકે, મોહસિન નકવી એટલા સહેલાઈથી માન્યા નહોતા. નકવીએ પહેલા બહિષ્કાર પાછો ખેંચવા માટે આઈસીસી પાસે કેટલીક માંગણી કરી હતી, પણ તેને નકારી દેવામાં આવી. માંગણી નકારાતા સ્પષ્ટ હતું કે પાકિસ્તાન અને બાંગ્લાદેશ પર આઈસીસી કાર્યવાહી કરશે. આવી સ્થિતિમાં પીસીબી અને બીસીબીએ પરસ્પર ચર્ચા કરીને મન બદલવાનો નિર્ણય લીધો. કેટલાક રિપોર્ટ્સ અનુસાર એવું પણ કહેવાય છે કે નકવીએ બુલબુલ સાથે સંપર્ક કરીને તેમને વિનંતી કરી હતી કે તેઓ પાકિસ્તાનને ભારત સામે મેચ રમવા માટે અપીલ કરે, કારણ કે આ વિવાદને સમાપ્ત કરવાનો એ સૌથી સન્માનજનક રસ્તો છે. આવામાં માનવામાં આવી રહ્યું છે કે આગામી 24 કલાકમાં બહિષ્કાર પાછો ખેંચવાને લઈને ઔપચારિક જાહેરાત થઈ શકે છે.