301 દુલ્હનોને ફ્રી મેકઅપ, રાજકોટની ટીમે બાગેશ્વરધામમાં રચ્યો માનવસેવાનો ઇતિહાસ

આ મહાપ્રસંગમાં રાજકોટના કલ્યાણી હેર બ્યુટી સલૂનના ઓનર પરેશભાઈ જોટંગિયાએ પોતાની ટીમ સાથે વિશેષ સેવા આપવા સંકલ્પ લીધો. પરેશભાઈ બાગેશ્વરધામના પંડિત ધીરેન્દ્ર શાસ્ત્રીના ઉપાસક છે અને ત્યાંથી દીક્ષા પ્રાપ્ત કરી ચૂક્યા છે. તેમના માર્ગદર્શન હેઠળ સલૂનની 40થી વધુ મેકઅપ આર્ટિસ્ટની ટીમ બાગેશ્વરધામ પહોંચી હતી. ટીમે એક દિવસ અગાઉથી જ તૈયારી શરૂ કરી દીધી હતી જેથી દરેક દીકરીને સમયસર અને સુંદર રીતે દુલ્હન તરીકે તૈયાર કરી શકાય. વહેલી સવારથી જ મેકઅપ આર્ટિસ્ટોએ પોતાના કાર્યમાં લાગી જઈ દરેક દીકરીને ખાસ દિવસની લાગણી અનુભવાય તે માટે દિલથી મહેનત કરી. દરેક દુલ્હનના કોસ્ચ્યુમ, મેકઅપ અને વાળની સ્ટાઇલ પર વિશેષ ધ્યાન અપાયું. આ સમગ્ર સેવા સંપૂર્ણપણે વિનામૂલ્યે આપવામાં આવી, જે આ ટીમની સામાજિક પ્રતિબદ્ધતાને દર્શાવે છે. દીકરીઓના ચહેરા પર ઝળહળતું સ્મિત અને પરિવારજનોની આંખોમાં દેખાતો આનંદ, આ સેવાકાર્યની સાચી સફળતા બની રહ્યો હતો.

આ સેવા યજ્ઞમાં સલૂનની ઓનર આશાબેન જોટંગિયા પણ સહભાગી બન્યા હતા. મહિલાઓની ટીમે સંકલન, વ્યવસ્થા અને માર્ગદર્શન દ્વારા સમગ્ર પ્રક્રિયાને સુચારૂ રીતે પૂર્ણ કરી. એક સાથે 301 દુલ્હનોને તૈયાર કરવાનું કાર્ય સહેલું ન હતું, છતાં સંકલિત આયોજન અને ટીમવર્કથી તે સફળતાપૂર્વક પાર પડ્યું. આ પ્રસંગે માત્ર મેકઅપ સેવા જ નહીં, પરંતુ જલસેવાનું પણ વિશેષ આયોજન કરવામાં આવ્યું હતું. સ્થળ પર ચારથી વધુ અલગ અલગ જગ્યાએ પાણી વિતરણની વ્યવસ્થા ગોઠવાઈ હતી, જેથી ઉપસ્થિત શ્રદ્ધાળુઓને ગરમી વચ્ચે રાહત મળી શકે. હજારો લોકો માટે ઠંડા પાણીની વ્યવસ્થા કરવી એ પણ એક મોટી સેવા સમાન બની.