ભક્તિનો મહાકુંભ! 8 લાખ ભક્તો ઉમટી પડશે, મુરલીધર દાદાનો ભવ્ય મહોત્સવ, 551 યજ્ઞકુંડનું નિર્માણ કરાયું

એક સપ્તાહ ચાલનારા મહોત્સવમાં રોજ એક લાખ માણસો દર્શનાર્થે આવશે. તેમજ તારીખ 26/2 ના 8 થી 9 લાખ લોકો આવશે તેવી આયોજકોની ગણતરી છે. 50 થી 70 હજાર ગાડીઓનું પાર્કિંગ થાય તે માટેની વ્યવસ્થા કરવામાં આવેલી છે. રસોડાની જો વાત કરીએ તો 600 જેટલા માણસો રસોડા વિભાગમાં કામ કરશે. 46 જેટલા ચૂલા બનાવવામાં આવેલા છે, જેમાં એક જ તેપલામાંથી 25000 જેટલા માણસો જમી શકે તેવી વ્યવસ્થા કરવામાં આવેલી છે.

એક દંતકથા મુજબ સ્વયં ભગવાન શ્રીકૃષ્ણએ પોતાના મુખમાંથી અર્જુનને આપેલ આ મૂર્તિ છે. મહાભારતના યુદ્ધ બાદ જ્યારે શ્રીકૃષ્ણ સદા માટે દ્વારિકા જતા હતા, ત્યારે ભગવાનનો રથ 2-3 કોસ ચાલતા ભગવાને અર્જુનને પાછા વળવા કહ્યું, ત્યારે અર્જુને કહ્યું, “હું આપના વિના એક ક્ષણ પણ નહીં રહી શકું.” ત્યારે ભગવાને પોતાના મુખમાંથી મૂર્તિ આપી અને કહ્યું કે જ્યારે આ મૂર્તિનું પૂજન કરી ધ્યાન કરીશ ત્યારે હું દિવ્ય સ્વરૂપે પ્રગટ થઈશ.

મુરલીધર દાદાની આ મૂર્તિ સેજકજી મહારાજાને મળેલ. ત્યાર બાદ સેજકજી મહારાજના વંશમાં રામદાસજી મહારાજ પાસે મૂર્તિ આવેલી. રામદાસજી મહારાજ દાદાની મૂર્તિ પોતાની પાઘડીમાં રાખતા. રામદાસજી મહારાજ કાશીની જાત્રા કરવા નીકળ્યા હતા, ત્યારે તેઓ મેવાડના મેહમાન બન્યા હતા. તે જ સમયે મહંમદ ખિલજી દ્વારા મેવાડના રાજા ઉપર આક્રમણ કરવામાં આવ્યું અને રામદાસજી મહારાજ દ્વારા પોતાના ક્ષત્રિય ધર્મ અપનાવતા યુદ્ધમાં તેઓ વીરગતિને પ્રાપ્ત થયા હતા અને મુરલીધર દાદાની મૂર્તિ રણમાં દટાઈ ગઈ હતી. રામદાસજી મહારાજના પૌત્ર વિસોજી મહારાજને મુરલીધર દાદા સપનામાં આવ્યા અને મેવાડમાં ચોક્કસ જગ્યાએ ખોદકામ કરતા ફરી મૂર્તિ મળી આવતા ઈ.સ. 1622માં વૈશાખ સુદ બીજના દિવસે મૂર્તિની સ્થાપના કરવામાં આવી અને ત્યાર બાદ ગામ વસવા આવેલું હતું.