ફાઈનલમાં અર્શદીપ અને મિચેલ વચ્ચે શું થયું હતું? કેપ્ટન સૂર્ય કુમારે મામલો ઠંડો પાડ્યો, બોલ વાગ્યા બાદ મામલો ગરમાયો હતો

અર્શદીપ સિંહની આ ઓવરમાં ડેરિલ મિચેલ બેક ટૂ બેક સિક્સર લગાવી રહ્યા હતા. આ દરમિયાન અર્શદીપે વાઈડ બોલ નાખ્યો હતો. બાદમાં મિચેલે ઓવરની પાંચમી બોલ રમતા ડિફેન્સ કર્યો હતો. અર્શદીપે આ સમયે પોતાના ફોલો થ્રોમાં બોલને ફિક્સ કરીને સીધો મિચેલના એન્ડ પર વિકેટને નિશાન બનાવીને થ્રો કર્યો હતો.

મિચેલ ક્રિઝની થોડા બહાર હતા. જોકે અર્શદીપનું નિશાન વિકેટ પર નહીં પણ બેટ્સમેન પર ગયું હતું. જેથી શાંત સ્વભાવના માનવામાં આવતા ન્યુઝીલેન્ડના ખેલાડીઓ અર્શદીપની આ હરકત પર ગુસ્સે ભરાયા હતા. સાથે જ તેમણે અમ્પાયર પાસે જઈને આ મામલે ફરિયાદ કરી હતી. મિચેલનો ગુસ્સો શાંત થવાનું નામ નહોતો લઈ રહ્યો. આ દરમિયાન મેદાનમાં ટીમ ઈન્ડિયાના કેપ્ટન સૂર્ય કુમાર યાદવે અમ્પાયર સાથે મળીને મિચેલનો ગુસ્સો શાંત કર્યો હતો.

અર્શદીપ સિંહે તરત જ પોતાની ભૂલ માની અને ઓવર પૂરી થયા બાદ મિચેલ સાથે હાથ પણ મળાવ્યો હતો. આ ઘટના બાદ મિચેલ વધુ સમય સુધી ક્રિઝ પર ટકી ન શક્યો. અક્ષર પટેલની ફુલ ટોસ બોલ પર મિચેલ પોતાની વિકેટ ગુમાવી બેઠો હતો. આ રીતે મિચેલે 11 બોલમાં 17 રન બનાવ્યા અને પછી આઉટ થઈ ગયા હતા.

ઉલ્લેખનીય છે કે ફાઈનલમાં ન્યુઝીલેન્ડ સામે ટોસ હાર્યા બાદ ટીમ ઈન્ડિયાએ પહેલા બેટિંગ કરી હતી. જેમાં 255 રન ટીમ ઈન્ડિયાએ બનાવ્યા હતા. જોકે બાદમાં ન્યુઝીલેન્ડની ટીમ માત્ર 160 રનમાં ઓલઆઉટ થઈ ગઈ હતી. આ વખતે અભિષેક શર્માની બેટિંગ ઘણી ચર્ચામાં રહી હતી. કારણ કે તેણે માત્ર 18 બોલમાં 51 રન બનાવીને ટીમ ઈન્ડિયાનો પાવરપ્લેમાં રેકોર્ડ બનાવ્યો હતો.