તેલ ડેપો પર ઇઝરાયેલના હુમલા પછી ઇરાનમાં થયો ‘ઝેરીલો’ વરસાદ, જાણો કેટલો છે ઘાતક

Israel-Iran Warfare Information : ઇઝરાયેલ દ્વારા ઇરાનના તેલ ડેપો પર કરવામાં આવેલા હુમલા પછી ઈરાનના કેટલાક ભાગોમાં કાળા રંગના વરસાદના અહેવાલો સામે આવ્યા છે. કેટલાક અહેવાલોમાં તેને “અમ્લીય વરસાદ” કહેવામાં આવ્યો છે.

ઈરાનની રેડ ક્રિસેન્ટ સોસાયટીએ ચેતવણી આપી છે કે આ વરસાદમાં રાસાયણિક તત્વો હોય છે અને તે અત્યંત ખતરનાક અને એસિડિક હોઈ શકે છે. ઇરાની નાગરિકોએ માથાનો દુખાવો, શ્વાસ લેવામાં તકલીફ અને ઇમારતો અને વાહનો પર તેલયુક્ત પાણી મળવાની ફરિયાદ કરી છે.

વાતાવરણીય રસાયણશાસ્ત્રી અને કેમિકલ એન્જિનિયરના જણાવ્યા અનુસાર આ વરસાદ માત્ર એસિડિક નથી. તેમાં સલ્ફ્યુરિક અને નાઇટ્રિક એસિડ તેમજ અન્ય ઘણા હાનિકારક રસાયણો પણ હોઇ શકે છે. આ માનવ સ્વાસ્થ્ય અને પર્યાવરણ માટે તાત્કાલિક અને લાંબા ગાળાના જોખમી છે.

પ્રદૂષકો વરસાદમાં ભળી જાય છે અને તેને વધુ હાનિકારક બનાવે છે

ઓઇલ ડેપો પરના હુમલાના ધુમાડામાં હાઇડ્રોકાર્બન, અલ્ટ્રાફાઇન કણો (પીએમ 2.5), પોલિસાયક્લિક એરોમેટિક હાઇડ્રોકાર્બન (પીએએચ) અને ભારે ધાતુઓનો સમાવેશ થઈ શકે છે. આ પ્રદૂષકો વરસાદમાં ભળી જાય છે અને તેને વધુ હાનિકારક બનાવે છે. ધુમાડામાં સલ્ફર ડાયોક્સાઇડ અને નાઇટ્રોજન ડાયોક્સાઇડ પણ હોય છે, જે વાતાવરણમાં સલ્ફ્યુરિક અને નાઇટ્રિક એસિડ બનાવવા માટે જવાબદાર છે. આ એસિડ પાણીના ટીપાંમાં ઓગળીને “એસિડ વરસાદ” બનાવે છે.

સ્વાસ્થ્ય પર થઈ શકે છે ગંભીર અસર 

નિષ્ણાતો કહે છે કે આ વરસાદ સામાન્ય એસિડ વરસાદ કરતા વધુ ખતરનાક છે.કારણ કે તેમાં ઝેરી અને કેન્સરને વધારનાર તત્વો હોય છે. સ્વાસ્થ્ય પર તેની અસર ગંભીર હોઈ શકે છે.

નિષ્ણાંતોના જણાવ્યા અનુસાર તેનાથી માથાનો દુખાવો, શ્વાસ લેવામાં તકલીફ અને અસ્થમા જેવી સમસ્યાઓ થઈ શકે છે. ખાસ કરીને વૃદ્ધો, બાળકો, ગર્ભવતી મહિલાઓને જોખમ છે. અલ્ટ્રાફાઇન કણો લોહીના પ્રવાહમાં પહોંચી શકે છે અને કેન્સર, હૃદય રોગ અને માનસિક વિકાર જેવા ગંભીર રોગોનું કારણ બની શકે છે. જ્યારે આ પ્રદૂષકો પાણીના સ્ત્રોતો સુધી પહોંચે છે, ત્યારે તે પાણી અને જળચર જીવો માટે પણ જોખમી હોઈ શકે છે.

આ પણ વાંચો – ઇરાનના તેલ ડેપો પર હુમલાથી અમેરિકા ભડક્યું, ઇઝરાયેલને મોકલ્યો મેસેજ

નિષ્ણાતોએ સલાહ આપી છે કે અસરગ્રસ્ત લોકો માસ્ક પહેરે, ઘરની અંદર રહે, દરવાજા અને બારીઓ બંધ રાખે અને બહારની હવાને ઘરની અંદર પ્રવેશવા ના દે. નિયમિત સફાઈ પણ જરૂરી છે.

ભૂતકાળના યુદ્ધો, જેમ કે ઇરાક અને કુવૈતમાં તેલના કુવાઓને નષ્ટ કરવા અને વિશાળ સળગતી સાઇટ્સમાંથી ઉઠતો ધુમાડા બતાવે છે કે પર્યાવરણ અને આરોગ્ય પર યુદ્ધની લાંબા ગાળાની અસર ઊંડી છે. હાલના સંજોગોમાં ઇરાનની સ્થાનિક વસ્તી પણ ગંભીર સ્વાસ્થ્ય જોખમનો સામનો કરી રહી છે.