ઝિમ્બાબ્વે સામે વેસ્ટઈંડીઝની ધુંઆધાર જીત: ભારત માટે મોટું નુકસાન, સેમીફાઈનલમાં પહોંચવા આવું કરવું પડશે

ઝિમ્બાબ્વે અને વેસ્ટઈંડીઝની વચ્ચે રમાયેલી ટી20 વર્લ્ડ કપની સુપર-8 મેચમાં રેકોર્ડનો વરસાદ થયો હતો. મુંબઈના વાનખેડે સ્ટેડિયમમાં રમાયેલી આ મેચમાં વેસ્ટઈંડીઝે 107 રનના મોટા અંતરથી મેચ જીતી લીધી. શિમરન હેટમાયરે 85 રનની તોફાની ઈનિંગ્સથી વેસ્ટઈંડીઝને 254 રનનો વિશાળ સ્કોર આપ્યો હતો. ત્યાર બાદ બોલર્સે ઝિમ્બાબ્વે પર ગાળીયો કસતા તેની ઈનિંગ્સ 17.4 ઓવરમાં 147 રન પર સમેટાઈ ગઈ હતી.

ગ્રુપ-1ની તમામ ટીમોએ હવે એક-એક મેચ રમી લીધી છે. વેસ્ટઈંડીઝની ટીમ ઝિમ્બાબ્વે સામે જીતથી ગ્રુપમાં સાઉથ આફ્રિકાને પછાડી નંબર 1 પર આવી ગઈ છે. વેસ્ટઈંડીઝે બે પોઈન્ટ મેળવી લીધા છે અને તેની રનરેટ ગ્રુપમાં સૌથી શાનદાર છે. વેસ્ટઈંડીઝની રનરેટ +5.350 છે. બીજા નંબર પર સાઉથ આફ્રિકાની ટીમ છે, તેમને પણ બે પોઈન્ટ છે. સાઉથ આફ્રિકાની રનરેટ +3.800 છે. વળી ભારતીય ટીમ ત્રીજા નંબરે છે. સાઉથ આફ્રિકા સામે મળેલી હારે ભારતની નેટ રનરેટને પણ ભારે નુકસાન પહોંચાડ્યું છે. ભારતની રનરેટ -3.800 છે. જેનું પોઈન્ટ ટેબલમાં ખાતું પણ નથી ખુલ્યું. ઝિમ્બાબ્વેની ટીમ પોઈન્ટ ટેબલમાં સૌથી પાછળ છે. તેનું ખાતું પણ નથી ખુલ્યું અને રનરેટ પણ સારી છે. ઝિમ્બાબ્વેની રનરેટ -5.350 છે. આવો હવે ભારતના સેમીફાઈનલના તમામ સમીકરણો જાણીએ.

ભારતની બાકી બે સુપર-8 મેચ ઝિમ્બાબ્વે અને વેસ્ટઈંડીઝ સામે છે. એક સમીકરણ એવું છે કે ભારતને હવે બંને મેચો મોટા અંતરથી જીતવી પડશે. આવું થશે તો ભારતના ચાર પોઈન્ટ થઈ જશે. જો કે તેમને એ પણ ધ્યાન રાખવું પડશે કે ટીમની રનરેટ વેસ્ટઈંડીઝથી સારી રહે. બીજી તરફ સાઉથ આફ્રિકા પોતાની બાકી બંને મેચ જીતી લે છે, તો તેના પોઈન્ટ થાય છે 6. આવા સમયે વેસ્ટઈંડીઝ બંને મેચ જીતી જશે અને તેને ભારતની બરાબર ચાર પોઈન્ટ રહેશે. પણ સારી રનરેટ સાથે ટીમ ઇન્ડિયા ટોપ-2માં રહેતા સેમીફાઈનલમાં પહોંચી જશે.