ગાંધીનગર: ભાજપના કાર્યકરો સ્થાનિક સ્વરાજની ચૂંટણીને લઈ મેદાનમાં, VB જી રામજી બિલથી રણનીતિ ઘડાશે

મહત્વનું છે કે મનરેગાના સ્થાને ગ્રામીણ વિકાસને વેગ આપવા માટે ભાજપ આ બિલનો સહારો લઈને ગ્રાઉન્ડમાં જવા માટેની રણનીતિ ઘડાઈ છે. ભાજપે VB જી રામજી બિલને ગ્રાઉન્ડ લઈ જવા માટે આજે ખાસ બેઠક ગાંધીનગર ખાતેના કમલમ ખાતે યોજી હતી. જે ભાજપના પ્રદેશ પ્રમુખ જગદીશ વિશ્વકર્મા અધ્યક્ષતામાં યોજાઈ હતી.

આજે ગુજરાત પ્રદેશ ભાજપ કાર્યાલયે મળેલી બેઠકમાં રાજ્યના તમામ જિલ્લાના જિલ્લા પ્રમુખો, જિલ્લાના સંગઠનમાં મહામંત્રીઓ તેમજ ધારાસભ્યો અને ભાજપના સાંસદ સભ્યોની ઉપસ્થિતિમાં બેઠક યોજાઈ હતી. આજે યોજાયેલી બેઠકમાં જી રામજી બિલને ગ્રાઉન્ડ ઉપર લઈ જવા માટેની રણનીતિ અંગે ટાસ્ક પણ કાર્યકરોને સોંપાયો હતો.

ભાજપ સ્થાનિક સ્વરાજ્યની ચૂંટણી પૂર્વે 18000 જેટલા ગામડાઓ VB જી રામજી યોજનાના ફાયદા વિશે ખેડૂતોને સમજાવશે. જેમાં ખાસ કરીને ખેડૂતો સાથે જનસંપર્ક માટેનો ભાર મૂકવામાં આવ્યો છે. એટલું જ નહીં VB જી રામજી બિલ અંગે ખેડૂતો સાથેનો ગ્રાઉન્ડમાં જઈને સંપર્ક કરીને સમજવા પર ભાર મુકાયો છે કે, મનરેગાનું અપડેટ વર્ઝન છે. તેવી રીતે પ્રચાર પ્રસાર કરવા માટે બિલ અંગે જનસંપર્ક કરવા માટે જણાવ્યું છે.

આ સિવાય જે ત્રુટીઓ મનરેગામાં હતી તે સુધારીને નવી યોજના અમલીકરણ બની છે, તેમજ નકારાત્મક રાજનીતિએ કોંગ્રેસનું મૂળ સિદ્ધાંત છે તે વાત મૂકીને કોંગ્રેસ પર પ્રહાર કરી પ્રચાર પ્રસાર માટેનો ટાસ્ક સોંપાયો છે. આમ ભાજપ સ્થાનિક સ્વરાજ્યની ચૂંટણી પૂર્વે ગુજરાતના ગામડા ખૂંદવા માટેની રણનીતિ બનાવી છે. હવે જોવાનું એ રહેશે કે વી રામજી બિલ અંગે ગ્રાઉન્ડ માં ભાજપના કાર્યકરોનો પ્રચાર પ્રસાર કેટલો રંગ લાવે છે. બિલ અંગે જનસંપર્ક ભાજપને સ્થાનિક સ્વરાજ્યની ચૂંટણીમાં કેટલો ફાયદો થાય છે તે તો સ્થાનિક સ્વરાજ્યની ચૂંટણી બાદ જ પરિણામ બાદ જ ખ્યાલ આવશે.