કેનેડાના ટોરન્ટોમાં અમેરિકાના દૂતાવાસ પર હુમલો, અજાણ્યો શખ્સ ધડાધડ ફાયરિંગ કરીને ફરાર

મંગળવારે સવારે 5:30 વાગ્યે અમેરિકી દૂતાવાસ પર ગોળીઓ ચાલી છે. પોલીસ સ્થળ પર પહોંચી તો હુમલાખોર ભાગી ગયો હતો. જોકે, ત્યારે ગોળીઓ ચાલવાના પાક્કા પુરાવાઓ મળ્યા છે. ઘણી ન્યૂઝ ચેનલમાં ચલાવવામાં આવેલ ફૂટેજ પર દૂતાવાસની બહાર મુખ્ય ગેટ અને કાચ પર ગોળીઓના નિશાન સ્પષ્ટ દેખાઈ રહ્યા છે. આ દૂતાવાસ ટોરન્ટોના એક એવા વિસ્તારમાં છે જ્યાં છેલ્લા કેટલાક સમયથી સતત પ્રદર્શનો થઈ રહ્યા છે.

ટોરન્ટોમાં ઘટેલી આ ઘટનાથી થોડા દિવસ પહેલા અમેરિકાના ટેક્સાસમાં પણ એક ભયાનક ઘટના બની હતી. ત્યાં એક હુમલાખોરે ભીડભાડવાળા બારમાં ઘૂસીને અંધાધૂંધ ફાયરિંગ કરી હતી. આ હુમલામાં 2 લોકોનું મોત થયું અને 14 લોકો ગંભીર રીતે ઘાયલ થયા હતા. હુમલાખોરનું નામ નદિઆગા ડિયાગને હતું, જે મૂળ સેનેગલનો રહેવાસી હતો અને હવે અમેરિકાનો નાગરિક બની ગયો હતો. પોલીસે તેને ઘટનાસ્થળે જ ઠાર માર્યો હતો. હુમલાખોરની કારમાંથી એક કુરાન મળી છે અને હુમલાના સમયે તેણે પહેરેલી શર્ટ પર ‘Property of Allah’ લખેલું હતું.

ઉલ્લેખનીય છે કે, FBI હવે આ બંને ઘટનાઓની તપાસ આતંકી હુમલા તરીકે કરી રહી છે. અધિકારીઓને શંકા છે કે આ હુમલાઓ ઈરાન અને અમેરિકા વચ્ચે ચાલી રહેલા તણાવનું પરિણામ છે. માનવામાં આવે છે કે હુમલાખોર ઈરાન પર અમેરિકા દ્વારા કરવામાં આવેલી બોમ્બમારાથી નારાજ હતો અને તેનો બદલો લેવા માટે તેણે સામાન્ય લોકોને નિશાન બનાવ્યા હતા. દૂતાવાસો પર વધી રહેલા હુમલાને ધ્યાનમાં રાખીને હવે દુનિયાભરમાં અમેરિકાના ઠેકાણાઓની સુરક્ષા વધારી દેવામાં આવી છે.