ઉનાળામાં વધે છે શોર્ટ સર્કિટનો ખતરો, નિષ્ણાતે આપી ઘર માટે જરૂરી ઇલેક્ટ્રિક સેફ્ટી ટિપ્સ

ઇલેક્ટ્રિક સેક્ટરમાં સુપરવાઇઝર તરીકે ફરજ બજાવતા એચ.એ. ઢાંકી જણાવે છે કે LCB અને ELCB જેવા પ્રોટેક્શન ઉપકરણો ઘરમાં હોવા ખૂબ જ જરૂરી છે. ઘણા લોકો આજના સમયમાં પણ ઇલેક્ટ્રિક પ્રોટેક્શનને પૂરતું મહત્વ આપતા નથી. ઘણીવાર લોકો ‘ચાલશે’ એવી માનસિકતા રાખીને નાની સમસ્યાઓને અવગણે છે. પરંતુ આવી બેદરકારીના કારણે મોટી દુર્ઘટનાઓ સર્જાઈ શકે છે. આજકાલ જે આગની ઘટનાઓ બને છે તેમાં મોટાભાગે ક્યાંકને ક્યાંક લોકોની અવગણનાનો પણ હિસ્સો હોય છે, કારણ કે લોકો LCB અને ELCB જેવા સુરક્ષા ઉપકરણો લગાવતા નથી.

વધુમાં જણાવ્યું હતું કે, LCB અને ELCB બંને ઘરને સુરક્ષિત રાખવા માટે બનાવવામાં આવ્યા છે. ખાસ કરીને ચોમાસા અથવા ભેજવાળા સમયમાં ઘણીવાર એવું બને છે કે જ્યારે કોઈ સ્વીચ ચાલુ કરીએ ત્યારે આપણને ઝટકો લાગે છે. તેનો અર્થ એ થાય છે કે સ્વીચમાં ભેજ છે અથવા તેમાં કોઈ પ્રકારની ખરાબી છે. પરંતુ મોટાભાગના લોકો તેને સામાન્ય બાબત માનીને ચલાવી લે છે. આવી સ્થિતિમાં જોખમ વધી શકે છે. જો ઘરમાં ELCB લગાવવામાં આવ્યું હોય તો આવી પરિસ્થિતિમાં તે સુરક્ષા આપે છે. જ્યારે પણ કરંટ લીકેજ થાય છે અથવા કોઈને શોક લાગવાની સ્થિતિ બને છે ત્યારે ELCB તરત જ ટ્રિપ થઈ જાય છે અને સ્વીચ આપોઆપ બંધ થઈ જાય છે. જેના કારણે કરંટનો પ્રવાહ બંધ થઈ જાય છે અને મોટી દુર્ઘટના ટળી શકે છે. આ રીતે ELCB ઇલેક્ટ્રિક શોકથી બચાવમાં મહત્વની ભૂમિકા ભજવે છે.

એચ.એ. ઢાંકી વધુમાં કહે છે કે ઘણીવાર ઇલેક્ટ્રિક કનેક્શન લૂઝ હોવાના કારણે સ્પાર્ક થાય છે. આ સ્પાર્કથી આગ લાગવાની શક્યતા વધી જાય છે. તેથી ઘર કે ફ્લેટમાં ક્યાંય કનેક્શન લૂઝ નથી તેની ચકાસણી કરવી જરૂરી છે. આ સાથે જ આખા મકાનમાં યોગ્ય રીતે અર્થિંગ કરવામાં આવ્યું છે કે નહીં તેની પણ ખાતરી કરવી જોઈએ. કારણ કે યોગ્ય અર્થિંગ ઇલેક્ટ્રિક સેફ્ટી માટે ખૂબ જ મહત્વપૂર્ણ છે. LCB અને ELCB બંને ભેગા હોય ત્યારે તેને સામાન્ય ભાષામાં રોબોટ પણ કહેવામાં આવે છે.