સિલિન્ડર અને ઇન્ડક્શનની ખેંચતાણમાં અમદાવાદની કોલેજની મેસનો જોરદાર જુગાડ, બનાવી દીધો ચૂલો

કોમર્શિયલ ગેસની સપ્લાય ઘટશે અથવા અછત ઊભી થશે તો હોસ્ટેલોમાં ચાલતી મેસ સેવા પર અસર પડી શકે છે. જેના કારણે પોતાના ઘરથી કિલોમીટરો દૂર રહીને ભણતા વિદ્યાર્થીઓને મુશ્કેલીનો સામનો કરવો પડી શકે છે. એલડી એન્જિનિયર કોલેજની મેસમાં રોજના અંદાજે 150 વિદ્યાર્થીઓ જમતા હોય છે. આ લોકોને જમાડવા માટે મેસને એક મહિનાના 45થી 50 સિલિન્ડરની જરૂર પડે છે.

એલડી એન્જિનિયર કોલેજની મેસના સંચાલક નરેશભાઈએ અમારી ટીમ સાથે ખાસ વાતચીત કરી હતી. જેમાં તેમણે જણાવ્યું છે કે, રોજ એક ટંકના 150થી 200 છોકરાઓ મેસમાં જમતા હોય છે. સામાન્ય રીતે મહિનાના 45થી 50 ગેસના સિલિન્ડર અમને જોઈતા હોય છે. હોળીની રજાઓ બાદ સોમવારથી તો કોલેજ પણ રાબેતા મુજબ ચાલી રહી છે. અમારી પાસે થોડો સ્ટોક હતો એટલે અત્યાર સુધી ચાલ્યું. જો હજી થોડા દિવસ આવુંને આવું ચાલશે તો અમને તકલીફ પડશે. એટલે અમે આનું ઓપ્શન શોધી લીધું છે. અમે અહીં મેસની પાછળ જ એક ચૂલો બનાવી દીધો છે. આ સાથે અમે ઇલેક્ટ્રિક ઇન્ડક્શન પણ એપ્લાય કર્યું છે. જોકે, તેની પણ ડિમાન્ડ વધારે હોવાને કારણે અમને ડિલિવરી મળી નથી રહી.

આ સાથે તેમણે એમ પણ જણાવ્યું છે કે, હાલ અમને સિલિન્ડર તો મળે છે પરંતુ ક્યારેક એક મળે તો ક્યારેક બે મળે. એટલે અમારે ચૂલો પણ બનાવવો પડ્યો છે. આ રીતે અમે વિદ્યાર્થીઓને જમાડીએ છીએ. હાલ તો વિદ્યાર્થીઓને ચિંતા કરવાની જરૂર નથી. જો આ જ સ્થિતિ વધારે દિવસો માટે રહેશે તો વિદ્યાર્થીઓને અને અમારે તકલીફ રહેવાની છે.