પાકિસ્તાની ક્રિકેટર શાહિદ આફ્રિદીનું ભારતીય ટીમ પર દિલ આવ્યું! સંજુ સેમસન અને જસપ્રીત બુમરાહ માટે કર્યો ખાસ શબ્દોનો પ્રયોગ

નોંધનીય છે કે, ભારત તરફથી જસપ્રીત બુમરાહ સ્ટાર બોલર રહ્યો છે, જેણે આ ટી20 વર્લ્ડ કપમાં વરુણ ચક્રવર્તિની બરાબરી કરીને સૌથી વધુ 14 વિકેટ લીધી છે. જેમાં સેમિફાઈનલ અને ફાઈનલમાં તેની બોલિંગની જબરજસ્ત બોલબાલા રહી હતી.

શાહિદ આફ્રિદીએ ભારતીય ટીમની પ્રશંસા કરીને કહ્યું કે, ભારતીય ટીમે વર્લ્ડ કપ જીત્યો છે અને તેઓ જ જીતના હકદાર હતા, ભારતીય ટીમ જબરજસ્ત ટીમ કોમ્બિનેશન સાથે મેદાન પર ઉતરી હતી, જે ખેલાડીઓ બહાર બેઠા હતા તેઓ પણ એટલા જ સારા હતા, હું કાયમ કહું છું કે બેન્ચ સ્ટ્રોંગ હોવી જોઈએ અને ભારતીય ટીમની બેન્ચ પણ મજબૂત હતી. ભારતીય ટીમ આખી ટુર્નામેન્ટમાં ચેમ્પિયનની જેમ રમી છે.

સંજુ સેમસનનો ઉલ્લેખ કરીને આફ્રિદીએ કહ્યું કે, તેને લાંબા સમય પછી તક મળી અને તેણે ઓપનિંગમાં આવીને ભરપૂર ફાયદો ઉઠાવ્યો છે. તેણે તક જોઈને રન બનાવવામાં સફળતા હાંસલ કરી હતી, અભિષેક શર્માએ પણ (ફાઈનલ) જબરજસ્ત પ્રદર્શન કર્યું, આ સિવાય ઈશાન કિશનનું આઉટસ્ટેન્ડિંગ પ્રદર્શન રહ્યું હતું. પાકિસ્તાન સામે પણ તેણે શાનદાર રમત રમી હતી અને વર્લ્ડ કપમાં તેનું સારું પ્રદર્શન રહ્યું હતું.

જસપ્રીત બુમરાહને દુનિયાનો શ્રેષ્ઠ બોલર કહીને આફ્રિદીએ કહ્યું કે, ટીમને જ્યારે જરુર હતી ત્યારે બુમરાહે પોતાની જવાબદારી નિભાવી છે, નવો બોલ હોય કે જૂનો બોલ તેણે શાનદાર પ્રદર્શન કર્યું છે.

ન્યૂઝીલેન્ડની ટીમ પાસે શરુઆતની 6 ઓવરમાં તક હતી પરંતુ તેમના ઓપનર્સ નિષ્ફળ રહ્યા હતા. આ બધામાં ભારતીય ટીમે ગજબનું ફોર્મ બતાવ્યું અને તેમને ટ્રોફી જીતવા બદલ હું ખુબ-ખુબ શુભેચ્છાઓ પાઠવું છું.