Final Up to date:
ઓઈલનું એક એક ટીપું બચાવવા માટે પાકિસ્તાને હવે ડિજિટલ મદદ લીધી છે. મુખ્યમંત્રીએ આદેશ આપ્યો છે કે આખા પંજાબમાં 10 માર્ચથી 31 માર્ચ સુધી તમામ સ્કૂલ, કોલેજ અને યુનિવર્સિટી બંધ રહેશે.
લાહોર: ઈરાન અને અમેરિકાની વચ્ચે ચાલી રહેલા ભીષણ યુદ્ધની આગ હવે પાકિસ્તાન સુધી પહોંચી ગઈ છે. ખાડી વિસ્તારમાં તણાવ અને ઓઈલની સપ્લાય ઠપ થવાથી પાકિસ્તાનમાં પેટ્રોલ-ડીઝલનો હાહાકાર મચી ગયો છે. સ્થિતિ એ હદે બેકાબૂ થઈ ચૂકી છે કે પાકિસ્તાનના પંજાબ પ્રાંતના મુખ્યમંત્રી મરિયમ નવાઝ શરીફે મંત્રીઓ અને સરકારી બાબુઓ પર એવા પ્રતિબંધો લગાવી દીધા છે, જેની કોઈએ કલ્પના પણ નહોતી કરી.
મુખ્યમંત્રી મરિયમ નવાઝે સ્પષ્ટ કરી દીધું છે કે જ્યાં સુધી આ પેટ્રોલિયમ સંકટ ખતમ ન થાય, ત્યાં સુધી રાજ્ય સરકારના મંત્રીઓને પેટ્રોલ-ડીઝલ નહીં આપવામાં આવે. એટલે કે હવે મંત્રીઓને પોતાના ખિસ્સાના પૈસાથી ગાડીઓમાં પેટ્રોલ અને ડીઝલ પુરાવવું પડશે. અન્યથા પોતાની ગાડીઓને ઘરે રાખી મૂકવી પડશે.
એટલું જ નહીં, મંત્રીઓ અને સિનિયર અધિકારીઓ સાથે ચાલનારા પ્રોટોકોલ વાહનો પર પણ પ્રતિબંધ લગાવી દીધો છે. હવે કોઈ પણ મંત્રી લાંબી લાંબી ગાડીઓના કાફલા સાથે ફરી શકશે નહીં. સુરક્ષાના નામ પર ખાલી એક ગાડી લઈ જવાની પરવાનગી આપવામાં આવી છે. સરકારી અધિકારીઓ માટે પેટ્રોલ અને ડીઝલના ભથ્થામાં તાત્કાલિક પ્રભાવથી 50 ટકા કાપ મૂકવામાં આવ્યો છે.
ઓઈલનું એક એક ટીપું બચાવવા માટે પાકિસ્તાને હવે ડિજિટલ મદદ લીધી છે. મુખ્યમંત્રીએ આદેશ આપ્યો છે કે આખા પંજાબમાં 10 માર્ચથી 31 માર્ચ સુધી તમામ સ્કૂલ, કોલેજ અને યુનિવર્સિટી બંધ રહેશે. જો કે પરીક્ષાઓ નિશ્ચિત શેડ્યૂલ અનુસાર લેવાશે, પણ ભણતર માટે ઓનલાઈન ક્લાસનો વિકલ્પ આપવામાં આવ્યો છે.
સરકારી ઓફિસોમાં પણ વર્ક ફ્રોમ હોમ નીતિ લાગુ કરી દીધી છે. ફક્ત એ જ કર્મચારીઓ ઓફિસે આવશે, જેમના વિના કામ અટકી શકે છે. ખાનગી કંપનીઓને પણ સલાહ આપવામાં આવી છે કે તે પોતાના કર્મચારીઓને ઘરેથી કામ કરવાની સુવિધા આપે અને ઓફિસોમાં ભીડ ઓછી કરે.
પાકિસ્તાનના ફેમસ હોર્સ એન્ડ કેટલ શો સહિત સરકારે તમામ આઉટડોર અને સાંસ્કૃતિક કાર્યક્રમો રદ કરી દીધા છે. મરિયમ નવાઝે જનતાને પણ અપીલ કરી છે કે તેઓ મોડી રાત સુધી કરતા શોપિંગ અને બિનજરૂરી બહારના કાર્યક્રમો અટકાવે. બજાર જલદી બંધ કરવા અને વીજળી અને ઈંધણ બચાવવાના કડક નિર્દેશ આપ્યા છે.
પેટ્રોલની તંગીની વચ્ચે બ્લેક માર્કેટિંગ અને જમાખોરી રોકવા માટે પંજાબ સરકારે જિલ્લા પેટ્રોલિયમ દેખરેખ સમિતિ બનાવી છે. પંજાબ સૂચના પ્રૌદ્યોગિકી બોર્ડને પેટ્રોલિયમ પ્રોડક્ટ માટે એક હાઈ-ટેક ટ્રેક એન્ડ ટ્રેસ સિસ્ટમ બનાવવાની જવાબદારી સોંપવામાં આવી છે. જેના દ્વારા પોલીસ અને પ્રશાસન પર નજર રાખશે કે પેટ્રોલ પંપ પર આવતા લોકો ઈંધણ ક્યાં લઈ જાય છે અને તેને કોઈ ઊંચા ભાવે વેચતા નથી ને. ટ્રાન્સપોર્ટના ભાડા પર પણ કડક નજર રાખવામાં આવી રહી છે, જેથી તેલની કમીનું બહાનું બનાવી બસ અને ટ્રક માલિકો જનતાને લૂંટે નહીં.
Mar 09, 2026 10:19 PM IST
