થાઈલેન્ડમાં એક બંદૂકધારીએ આતંક મચાવ્યો છે. તેણે શાળામાં ઘૂસીને શિક્ષકો અને બાળકોને બંધક બનાવ્યા. પોલીસે જણાવ્યું કે શાળા ખુલવાની તૈયારીમાં હતી ત્યારે જ બંદૂકધારી શાળામાં ઘૂસી ગયો. સ્થાનિક મીડિયા અનુસાર હુમલાખોરે કેટલાક શિક્ષકો અને બાળકોને બંધક બનાવ્યા હતા. પછીના અપડેટમાં એક પોલીસ અધિકારીએ જણાવ્યું હતું કે બુધવારે દક્ષિણ થાઈલેન્ડના હાટ યાઈ જિલ્લામાં એક શાળામાં ગોળીબાર કરનાર બંદૂકધારીની અટકાયત કરવામાં આવી છે. બધા બંધકોને મુક્ત કરવામાં આવ્યા છે.
અધિકારીઓએ સોશિયલ મીડિયા પર અહેવાલ આપ્યો હતો કે બુધવારે સવારે સોંગખલા પ્રાંતના હાટ યાઈમાં પટોંગપ્રથાનાકિરીવાત શાળામાં એક 18 વર્ષીય વ્યક્તિ બંદૂક સાથે પ્રવેશ્યો હતો.
ઘટનાની જાણ થતાં સશસ્ત્ર પોલીસ ટીમો ઘટનાસ્થળે પહોંચી હતી. સેંકડો બાળકો શાળામાંથી ભાગી છૂટવામાં સફળ રહ્યા. ઘણા શિક્ષકો અને વિદ્યાર્થીઓ ઇમારતની અંદર ફસાયેલા હતા અને હવે તેમને બહાર કાઢવામાં આવ્યા છે. હાટ યાઈ જિલ્લાના અધિકારીઓએ જણાવ્યું હતું કે અટકાયત કરાયેલ બંદૂકધારીની પૂછપરછ કરવામાં આવી રહી છે. સ્થાનિક મીડિયાએ અહેવાલ આપ્યો છે કે ગોળીબારથી બચી ગયેલા એક સુરક્ષા ગાર્ડે જણાવ્યું હતું કે બંદૂકધારીએ શાળાના મુખ્ય શિક્ષકને ગોળી મારી હતી.
